ლეგენდარული კინოსტუდია Metro-Goldwyn-Mayer-ი, შესაძლოა, ინდურმა კონცერნმა Sahara India Pariwar-მა 2,4 მლრდ დოლარად შეიძინოს.
გავრცელებული ინფორმაციით, მხარეები წინასწარ მოლაპარაკებებს აწარმოებენ.
სექტემბრის დასაწყისში კინოსტუდიამ 29 ოქტომბრამდე დავალიანების მორიგი, მეშვიდე გადავადების შესაძლებლობა მიიღო. როგორც მოსალოდნელია, Metro-Goldwyn-Mayer-ი გაკოტრების შესახებ განცხადებას გააკეთებს. იმ შემთხვევაში, თუ მოლაპარაკებები ჩაიშლება, კინოსტუდიაზე კონტროლს ჰერი ბარბერი და როჯერ ბერნბაუმი აიღებენ, რომლებიც საპროდიუსერო კომპანია Spyglass Entertainment-ს ხელმძღვანელობენ.
კინოსტუდიის დავალიანება 4 მლრდ დოლარს შეადგენს. Sahara თანახმაა, მის კრედიტორებს ყოველ ჩადებულ დოლარზე 60 ცენტი გადაუხადოს (სულ 2,4 მლრდ დოლარი). თუმცა ანალიტიკოსები დარწმუნებულები არიან, რომ ეს საკმარისი არ იქნება იმისათვის, რომ ინვესტორები დაინტერესდნენ.
