„ვხატავთ რომპეტროლს" 2010 წლის სეზონი მთაწმინდის პარკში მასშტაბური აქციით დასრულდა. პარკის შესასვლელში გამოიფინა პროექტის განმავლობაში შეგროვებული ნახატები, ბავშვებს ართობდნენ პროფესიონალი ანიმატორები და ასევე, რომპეტროლისაგან საჩუქრად, მთელი დღის განმავლობაში ყველა საბავშვო ატრაქციონზე პატარები უფასოდ ერთობოდნენ.
გამოფენა-გაყიდვა რომპეტროლ საქართველოს გენერალურმა დირექტორმა ალექსანდრე ალბინმა გახსნა, რომელმაც 1000 ლარად წყნეთის ბავშვთა სახლის აღსაზრდელების მიერ შექმნილი ნახატი შეიძინა.
„აქციამ „ვხატავთ რომპეტროლს" წელს ხუთჯერ სხვადასხვა ქალაქში ბავშვებს ლამაზი დღეები აჩუქა და ყველა ასაკის ათასობით ადამიანი გააერთიანა. შეიქმნა ძალიან ბევრი საინტერესო ნახატი და მოხარული ვარ, რომ გამოფენამაც ასეთი ინტერესი გამოიწვია. დრეს პარკში წყნეთის ბავშვთა სახლის აღსაზრდელებიც მოვიყვანეთ. უფასო ატრაქციონების გარდა, ბავშვებისთვის ასევე სახალისო შოუ პროგრამებიც მოეწყო. ნახატების გაყიდვიდან შემოსული თანხა მთლიანად მზრუნველობამოკლებულ ბავშვებს მოხმარდება," - განაცხადა „რომპეტროლ საქართველოს" გენერალურმა დირექტორმა ალექსანდრე ალბინმა.
მზრუნველობა მოკლებული ბავშვების დასახმარებლად აქცია დევიზით - „შეითავსე მხატვრის როლი, და დახატე რომპეტროლი" საქართველოს სხვადასხვა ქალაქებში პირველად გასულ წელს ჩატარდა. წელს აქციამ „ვხატავთ რომპეტროლს" განახლებული ფორმატით მოიარა ბათუმი, გაართო ბავშვები გორში, ბორჯომში, ჩატარდა თბილისის ზოოპარკში, 29 აგვისტოს კი წყნეთის ბავშვთა სახლს სტუმრობდა.
აღნიშნული პროექტი „რომპეტროლის" სოციალური პასუხისმგებლობის პლატფორმის ფარგლებში ხორციელდება, რომლის სახელწოდებაა "ჩვენი მომავლის ენერგია".
"რომპეტროლ ჯგუფი" ტრანსნაციონალური ნავთობკომპანიაა, მისი მთავარი ოფისი ამსტერდამში მდებარეობს და ამჟამად მსოფლიოს 16 ქვეყანაში აქვს წარმომადგენლობა. ძირითადად წარმოდგენილია საფრანგეთში, რუმინეთში, ესპანეთსა და სამხრეთ-აღმოსავლეთ ევროპაში. "რომპეტროლ საქართველო" ევრო სტანდარტის საწვავის უმსხვილესი მომწოდებელია ქართულ ბაზარზე.
