12-წლიანი შესვენების შემდეგ ჰიდროელექტროსადგური "ხრამი 2" სრული დატვირთვით ამუშავდა. ჰიდროელექტროსაგურზე, რომლის ორი აგრეგატი ერთობლივ რეჟიმში 1998 წლის შემდეგ პირველად ამუშავდა, კაპიტალური სარემონტო სამუშაოები განხორციელდა. დამონტაჟდა მოდერნიზებული იტალიური ტურბინები. სადგურის სადერივაციო მილსადენების სფერული ჩამკეტები საქართველოში ანალოგის არმქონე ჰაერ-ზეთოვანი ზედდამწნევი მოწყობილობით აღიჭურვა, რომლის საშუალებითაც ტურბინა გენერატორების ექსპლუატაცია სრულიად უსაფრთხო გახდა. SIEMENS-ის ფირმის თანამედროვე ელექტრომოწყობილობების სისტემების დანერგვით სადგურის მართვა მთლიანად კომპიუტერიზებულია.
დამონტაჟდა ახალი მართვის ფარი, რის შედეგადაც ჰიდროელექტროსადგურის ოპერირების ხარისხი მნიშვნელოვნად გაიზარდა.
სარეაბილიტაციო სამუშაოების დასრულების შემდეგ `ხრამჰესი 2-ს" ელეტროენერგეტიკული მაჩვენებლები გაუმჯობესდა.
ჰიდროელექტროსადგურის 2 ტურბინა გენერატორის საპროექტო დადგმული სიმძლავრე, რომელიც 110 მგვტ/სთ-ს შეადგენდა, 120 მგვტ/სთ-მდე გაიზარდა. შედეგად, სადგურის წლიური გამომუშავების ჯამური ენერგია 370 მლნ კვტ/სთ-ს მიაღწევს. `ხრამი 1" და `ხრამი 2" ჰიდროელექტროსადგურების ჯამური გამომუშავება კი 650 მლნ კვტ/სთ-ს შეადგენს, რაც თბილისის მიერ წლიურად მოხმარებული ელექტროენერგიის მესამედია.
ჰიდროელექტროსადგურ `ხრამჰესი 2-ს" რეაბილიტაციის პროცესი 1996 წელს დაიწყო, რომლის განსახორციელებლად სახელმწიფოს იაპონიის მთავრობამ 50 მლნ ლარის ოდენობის მიზნობრივი სესხი გამოუყო. 2000 წელს შეწყვეტილი პროგრამის ხელახალი განხორციელება სს `ხრამი 2-მა" ჰიდროელექტროსადგურის ენერგოჰოლდინგ `ინტერრაოეეს-ის" დროებით მართვაში გადაცემის შემდეგ 2006 წელს დაიწყო, რისთვისაც სახელმწიფოს მიერ დამატებით 10,8 მლნ ლარი გამოყო. ჩატარებული სარეკონსტრუქციო სამუშაოების შედეგად ჰიდროელექტროსადგურის ერთი ტურბინა-გენერატორი სრული დატვირთვით 2008 წლიდან ამოქმედდა. მეორე გენერატორის სარეაბილიტაციოდ დამატებითი ინვესტიცია `ინტერრაოეეს-მა" 5 მლნ ლარის ოდენობით გაიღო".
ხრამი 2-ს" რეკონსტრუქციის II ეტაპი, 5 წლიანი საინვესტიციო პროგრამის ფარგლებში მომავალ წელს დაიწყება, რაც კომპანიის 220/110 კილოვოლტიანი ღია გამანაწილებელი ქვესადგურის რაბილიტაციასა და ჰიდროელექტროსადგურის ექსტერიერისა და ინტერიერის კაპიტალურ განახლებას მოიცავს. მაღალი ძაბვის ელექტროგამანაწილებელი მოწყობილობების მოდერნიზებისა და სამშენებლო სამუშაოების წარმართვის მიზნით `ინტერრაოეესი" კიდევ 5,5 მლნ ლარის ინვესტიციას განახორციელებს.
ჰიდროელექტროსადგურის რეაბილიტაციის მიზნით გამოყოფილ მიზნობრივ სახელმწიფო სესხს ს.ს. `ხრამი 2" უკვე 2009 წლიდან ემსახურება. წარმატებული მართვის შედეგად, საერთო ჯამში გამოყოფილი 60 მლნ ლარის სესხიდან კომპანიას ამჟამად 10 მლნ ლარი უკვე გასტუმრებული აქვს.