გუნდიდან წასული მინისტრების შეხვედრაზე ჩვენ მგონია, რომ არაფერი გვესაქმება, - განაცხადა საპარლამენტო უმრავლესობის წევრმა მამუკა მდინარაძემ ეკონომიკის ყოფილი მინისტრის, გიორგი ქობულიას 15 მაისს პარლამენტში ღია ფორმატის ფარგლებში დაგეგმილ გამოსვლასთან დაკავშირებით.
„მგონია, რომ მმართველი გუნდის წარმომადგენლები ამ შეხვედრას არ უნდა დაესწრონ და ეს გადაწყვეტილებაც იქნება მიღებული, გამომდინარე იქიდან, რომ გუნდიდან წასული დეპუტატების და გუნდიდან წასული მინისტრების შეხვედრაზე ჩვენ მგონია, რომ არაფერი გვესაქმება და ასევე საზოგადოებამ უკვე იცის და ხვდება კარგად კონკრეტულ მიზეზებს თუ რატომ გადადგა კონკრეტული ადამიანი თანამდებობიდან. დანარჩენი არის ნეგატიური პიარის ნაწილი, რაც მათი საქმეა, მათი უფლებაა, ეს გასაგებია, ყოველ შემთხვევაში განაწყენებული, გუნდიდან წასული ადამიანების შეკრებას ბუნებრივია ჩვენ არ დავესწრებით, - განაცხადა მდინარაძემ.
15 მაისს, ეკონომიკის ყოფილ მინისტრს გიორგი ქობულიას პარლამენტში მოუსმენენ. შეხვედრა დამოუკიდებელი დეპუტატების ინიციატივით იმართება. შეხვედრა 13:00 საათზე შედგება. ეკონომიკის მინისტრი, გიორგი ქობულია თანამდებიბიდან 2019 წლის 18 აპრილს გადადგა. მოგვიანებით, გიორგი ქობულიამ განაცხადა, რომ ის თავისი ნებით არ წასულა, რადგან წასვლის შესახებ მას განცხადება არ დაუწერია. ქობულიამ ეკონომიკის მინისტრის თანამდებობა 2018 წლის ივლისში დაიკავა.
