ფრაქცია „ევროპული საქართველო“ რუსული პროპაგანდის შესამცირებლად პარლამენტს კანონპროექტების პაკეტს წარუდგენს. პარტიის წევრის, სერგი კაპანაძის თქმით,კანონპროექტის პაკეტი მიზნად ისახავს, რომ პარლამენტმა რუსეთიდან მომავალი საფრთხე, რომელიც პროპაგანდას უკავშირდება, აღიაროს. კაპანაძე მიიჩნევს, რომ პარლამენტმა რუსეთიდან მომავალი პროპაგანდა, პოლიტიკურ დონეზე უნდა აღიაროს საფრთხედ, ხოლო მთავრობამ განსაზღვროს ისეთი ორგანო, რომელიც იქნება პასუხისმგებელი, რათა ებრძოლოს საქართველოში რუსულ პროპაგანდას და საფრთხეებს.
„ბოლო პერიოდში ვხედავთ, რომ რუსეთმა სხვადასხვა ბერკეტით, ასევე სხვადასხვა ორგანიზაციის დაფინანსებისა თუ „რბილი ძალის“ სხვა მეთოდების გამოყენების გზით, საქართველოში თავისი გავლენა გაზარდა, რაც ჩვენი ქვეყნის უსაფრთხოებისთვის სერიოზული საფრთხის შემცველია. ამიტომ, დღეს ჩვენ იმ საკანონმდებლო პაკეტის ინიცირებას ვახდენთ, რომელიც მოიცავს რამდენიმე კანონში ცვლილებებს და რომელიც მიზნად ისახავს შემდეგს: პირველ რიგში, რუსეთის ფედერაციის მთავრობას ან ისეთ ორგანიზაციებს, ფიზიკურ თუ იურიდიულ პირებს, რომლებშიც რუსეთის ფედერაციის მთავრობაა მთავარი ბენეფიციარი, არ ჰქონდეთ საშუალება, რომ საქართველოში დახარჯონ თავიანთი ფული თავიანთივე პროპაგანდული მიზნებისთვის. მეორე - ეს საკანონმდებლო პაკეტი მიზნად ისახავს, რომ საქართველოს ხელისუფლებას, არ აქვს მნიშვნელობა რომელი ხელისუფლება იქნება ეს მომავალში, არ ჰქონდეს საშუალება იურიდიულად, რომ ფული მისცეს, შესყიდვა განახორციელოს თუ სხვა გზით ბიუჯეტის სახსრები ისეთი ორგანიზაციებისკენ მიმართოს, რომლებიც მოწინააღმდეგე არიან საქართველოს ევროპული და ევროატლანტიკური ინტეგრაციის, რაც საქართველოს კონსტიტუციით გარანტირებული საგარეო პოლიტიკური ვექტორია. ასევე არ ჰქონდეს საშუალება, დააფინანსოს ისეთი ორგანიზაციები, არ აქვს მნიშვნელობა ეს იქნება მედია თუ სხვა, რომელიც პირდაპირ იქნება რუსეთის პროპაგანდისტული მესიჯბოქსი საქართველოში, კონკრეტულად კი, შეეწინააღმდეგება მაგალითად, საქართველოს ტერიტორიულ მთლიანობას", - თქვა კაპანაძემ.
