საქართველოს პარლამენტის დღევანდელ პლენარულ სხდომაზე „ზოგადი განათლების შესახებ“ კანონში ცვლილებები პირველი მოსმენით ჩავარდა. კანონპროექტს მხარი დაუჭირა 61-მა დეპუტატმა, წინააღმდეგი იყო 18 პარლამენტარი, საჭირო იყო 68 დეპუტატის მხარდაჭერა.
დეპუტატებს შორის ცხარე კამათი გამოიწვია კანონიდან ტერმინ „ლიბერალურის“ ამოღების საკითხმა. უმრავლესობის წევრები ითხოვდნენ, კენჭისყრა პირველი მოსმენით ჩატარებულიყო და ტერმინებთან დაკავშირებით მეორე მოსმენაზე ემსჯელათ, რასაც“ნაციონალური მოძრაობა“, „ევროპული საქართველო“ და „ქართული ოცნების“ ნაწილი არ დაეთანხმა.
კანონპროექტის მიხედვით, კანონიდან ამოღებული უნდა იყოს სიტყვა „ლიბერალური”. ცვლილებების ავტორები განათლების კომიტეტის თავმჯდომარის მოადგილე გენადი მარგველაშვილი და წევრი ნუკრი ქანთარია არიან. დღეს მოქმედი კანონის მე-3 მუხლი ზოგადი განათლების სფეროში სახელმწიფო პოლიტიკის ძირითად მიზნებს ადგენს. კანონპროექტში კი აღნიშნულია, რომ ამ მუხლით განსაზღვრული მიზნები „ბავშვის უფლებების შესახებ“ კონვენციის მოთხოვნებსა და სულისკვეთებას არ შეესაბამება.
ტერმინის ამოღებას ითხოვს „პატრიოტთა ალიანსის“ წარმომადგენლი ადა მარშანია. მისი თქმით, „პარლამენტში ხდება ტერმინოლოგიით მანიპულირება“.
„გინდათ, რომ ბავშვების გადაგვარების გზაზე დააყენოთ ქვეყანა. არ გამოგივათ ეს ამბავი. აბა რა პრეტენზია გაქვთ გამოჩენილო ლიბერალებო. რა გამრუდებული აზროვნების დეპუტატები ჰყავს ქვეყანას, რა დაგემართათ, რა ფეტიშიზმია აქ გაბატონებული ევროპის მიმართ“, – განაცხადა ადა მარშანიამ.
ნუკრი ქანთარიას განმარტებით, ლიბერალური ნიშნავს თავისუფლებას, თავისუფალი აზროვნების ჩამოყალიბების შესახებ კი, კანონში ჩანაწერი ისედაც არსებობს. მისივე თქმით, გაუგებარია, რატომ კეთდება განსაკუთრებული აქცენტი სიტყვა ლიბერალურიზე.
