ორი საათია საუბრობთ და სიტყვა რუსეთი არ გაჟღერებულა, საერთოდ, - მიმართა პარლამენტის წევრმა „ქართული ოცნებიდან“ რომან კაკულიამ თავდაცვის მინისტრს ლევან იზორიას პარლამენტში მინისტრის საათის ფარგლებში სიტყვით გამოსვლის შემდეგ.
„ცოტა ვარ გაოცებული, მართალი გითხრათ, ორი საათია საუბრობთ და სიტყვა რუსეთი არ გაჟღერებულა საერთოდ. თქვენ, უწყება, იმედია, არ ხართ დაკომპლექსებული იმ ძალიან უჩვეულო მოვლენით ამ ქვეყანაში, რომელსაც ადგილი აქვს და ეს არის ასეთი რამ: ჩვენ ვიცით, რომ არსებობს ძალიან მკაფიოდ ჩამოყალიბებული რუსული ორიენტაციის ძალა ამ ქვეყანაში, რომელიც თავის რიტორიკად, თავისი მიზნის მისაღწევად, ცხადია, იყენებს რუსეთის საფრთხეს მომავალში ჩვენი ქვეყნისადმი ნატოსკენ მიმავალ გზაზე და იმის გამო, რომ ბევრ ადამიანს, რომელსაც ევროპული ორიენტაცია გვაქვს და ჩვენი მიზანიც ეს არის - არ გვინდა ვიყოთ ასოცირებული ამ ადამიანებთან თუ ამ პოლიტიკოსებთან.
აქედან გამომდინარე, მნიშვნელოვანია საზოგადოებამ იცოდეს თუ როგორ უყურებთ ამ თემას. იმიტომ რომ აქ ორი ალტერნატივაა: პირველი, ეს საფრთხე არსებობს და ამ საფრთხისგან თავის დაცვის გარანტია არის ჩვენი მცდელობები და ამას პლუს საერთაშორისო მხარდაჭერა, რომელზეც ალბათ ვიღაც იტყვის, რომ არასათანადოა, მაგრამ ეს არის გარანტია იმისა, რომ 40 კილომეტრში მდგომი ტანკები არ იქნებიან თბილისში. და არის მეორე, მიუხედავად იმისა, რომ ვიცით რა ვისთან გვაქვს საქმე, ვლადიმირ პუტინის თუ რუსეთის სახით, ჩვენ შესაძლოა ვერ მივიღოთ, არ იყოს, შესაძლოა, მათთვის ეს მხარდაჭერა იმ მასშტაბის, რომ ეს საფრთხე ავიცილოთ, მაგრამ არის რა ეს ჩვენი საერთო არჩვევანი, ჩვენ მთლიანობაში მზად ვართ ამ გამოწვევის მისაღებად... რა მოტივით არ ისაუბრეთ ამ გამოწვევებზე“, - განაცხადა კაკულიამ.
