ხვალ, 16 სექტემბერს, 12:00 საათზე, მარნეულში მექანიზაციის პირველი ცენტრი იხსნება. ღონისძიებას პრეზიდენტის რწმუნებული ქვემო ქართლში დავით კირკიტაძე, ათასწლეულის ფონდის აღმასრულებელი დირექტორი გიორგი აბდუშელიშვილი, აშშ-ის ათასწლეულის კორპორაციის, ადგილობრივი მთავრობის, "სი-ენ-ეფ-ეი"-საქართველოსა და ათასწლეულის ფონდის წარმომადგენლები, ასევე, ადგილობრივი ფერმერები დაესწრებიან.
ათასწლეულის ფონდის აგრობიზნესის განვითარების პროექტის 149,640-დოლარიანი გრანტითა და ცენტრის მეპატრონის 92,500 აშშ დოლარის თანადაფინანსებით მარნეულში მექანიზაციის ცენტრი აშენდა, სადაც განთავსებულია მანქანათა დასაყენებელი ღია და დახურული მოედნები, სამრეცხაო, ელექტრომექანიკური საამქრო, საწყობი და შენობის ადმინისტრაციული ნაწილი; შეძენილი იქნა ახალი ტრაქტორები და სხვადასხვა სახის მისაბმელები (გუთანი, კულტივატორი, სათესი და სხვა), დაიფარა გარემოსდაცვითი და მარკეტინგთან დაკავშირებული ხარჯები. მექანიზაციის ცენტრი მიმდებარე ტერიტორიაზე მცხოვრებ ფერმერებს მოემსახურება და სულ მცირე 8 ახალ სამუშაო ადგილს შექმნის.
მექანიზაციის ცენტრი იმავე ტერიტორიაზე მდებარეობს, სადაც ბაირამოვის მიერ ათასწლეულის ფონდის აგრობიზნესის განვითარების პროექტის ფარგლებში დაარსებული ფერმერთა მომსახურების ცენტრია. აღნიშნული ცენტრი 2008 წლიდან წარმატებულად ემსახურება ამ რეგიონში მცხოვრებ 4,700-მდე ფერმერს.
ათასწლეულის ფონდის აგრობიზნესის განვითარების პროექტის ფარგლებში სულ დამტკიცებულია 286 პროექტი პირველადი წარმოების, მცირე და საშუალო საწარმოებისა და ფერმერთა მომსახურების ცენტრების განვითარებისთვის საქართველოს ყველა რეგიონში, საერთო თანხით 16.2 მლნ. აშშ დოლარი, რაც, სავარაუდოდ, 3,600-მდე ახალი სამუშაო ადგილის შექმნის წინაპირობაა საქართველოს რეგიონებში.
