"ქრისტიან-დემოკრატები" პარლამენტისგან და შრომის, ჯანმრთელობისა და სოციალური დაცვის ახლად დანიშნულ მინისტრ სანდრო ურუშაძისგან იმ 25 ოჯახის პრობლემის მოგვარებას ითხოვენ, რომლებმაც მარჩენალდაკარგულის სტატუსის გარეშე დარჩნენ. ამის შესახებ განცხადება "ქრისტიან-დემოკრატების" წარმომადგენელმა მაგდა ანიკაშვილმა დღეს სესიაზე გააკეთა.
ანიკაშვილის განმარტებით, ხელისუფლებამ მნიშვნელოვანი გადაწყვეტილება მიიღო, როდესაც ოჯახებს, რომლებმაც ერთზე მეტი შვილი დაკარგა ომში ან დაკარგა მარჩენალი აიღოს პენსიაც და მარჩენალდაკარგულის შემწეობაც. თუმცა პრობლემა შეექმნა 25 ოჯახს მხოლოდ იმის გამო, რომ მათთვის ეს ინფორმაცია ხელმისაწვდომი არ იყო და შესაბამისად განცხადების დაწერა თავის დროზე ვერ მოახერხეს.
"როგორც იცით პენსიის და შემწეობის აღება შესაძლებელია იმ დროიდან როდესაც პირი დაწერს განცხადებას. 25 ოჯახმა კი განცხადება მხოლოდ აგვისტოში დაწერა იმის გამო, რომ ეს ადამიანები არიან ხანდაზმულნი და მათ ეს ინფორმაცია უბრალოდ არ იცოდნენ", - აცხადებს ანიკაშვილი და დასძენს, ამის გამო ეს ადამიანები არ უნდა დაისაჯონ.
ამასთან, მისვე თქმით, შეღავათის დაწესებისას მთავრობას ზუსტად ჰქონდა გათვლილი ბიუჯეტს რა დაუჯდებოდა, ამიტომ ამ პრობლემის მოგვარება ადვილი შესაძლებელი იქნება.
ანიკაშვილმა ჯანდაცვის მინისტრს მოუწოდა, რომ წინა მინისტრის ბრძანება შეცვალოს და განცხადების დაწერის ვადა 1 ოქტომბრამდე ან 1 ნოემბრამდე გადასწიოს.
ანიკაშვილის ამ მოთხოვნას პარლამენტის პირველი ვიცე-სპიკერიც მიხეილ მაჭავარიანიც გამოეხმაურა და პარლამენტის ჯანდაცვის კომიტეტის თავმჯდომარეს ოთარ თოიძეს დაავალა, ურუშაძესთან ამ პრობლემის მოსაგვარებლად კონსულტაციები გამართოს და პარლამენტს შედეგი პარასკევის სესიაზე მოახსენოს.
