ბაქოში დასრულებულ ენერგეტიკულ სამიტზე საქართველოს, აზებაიჯანის, რუმინეთის პრეზიდენტებმა და უნგრეთის პრემიერ-მინისტრმა განცხადებები გააკეთეს. ილჰამ ალიევმა პროექტში საქართველოს წვლილზე ისაუბრა და მიხეილ სააკაშვილს პროექტში მონაწილეობისათვის მადლობა გადაუხადა.
"მე მინდა მადლობა გადავუხადო იმ ქვეყნებს, რომლებიც ამ პროექტში მონაწილეობენ. განსაკუთრებული მადლობა მინდა გადავუხადო მიხეილ სააკაშვილს, რადგან საქართველო ამ პროექტის განხორციელების მთავარი გარანტია. ეს საუკუნის პროექტია, რომელიც რეგიონალური თანამშრომლობისა და ენერგოუსაფრთხოების გაღრმავების საფუძველი უნდა გახდეს. ძალზედ მნიშვნელოვანია პროექტში მონაწილე ყველა ქვეყნის როლი, როგორც მომპოვებლის ისე ტრანზიტორის", - განაცხადა ალიევმა.
საქართველოს პრეზიდენტის შეფასებით კი ენერგეტიკა მძლავრ იარაღად უნდა იქცეს და იგი არ უნდა იყოს პოლიტიკიდან მართული. მიხეილ სააკაშვილმა ნაბუკოს განხორციელების აუცილებლობაზეც ისაუბრა.
"ეს არის მნიშვნელოვანი გარღვევა ენერგოუსაფრთხოების საკითხებში. ენერგეტიკა უნდა გახდეს მნიშვნელოვანი იარაღი და არ უნდა იყოს ადვილად დასამორჩილებელი, პოლიტიკიდან გამომდინარე. ევროპა რუსეთის გვერდის ავლით მიიღებს ბუნებრივ აირს სწორედ აზერბაიჯანისა და საქართველოს მეშვეობით. ეს მნიშვნელოვანი ახალი პროექტია, მაგრამ სტრატეგიულად ასევე არანაკლებ მნიშვნელოვანია ნაბუკო, რომელიც ასევე უნდა განვითარდეს. ადრე მხოლოდ ბათუმისა და ფოთის პორტები იყო, ბოლო წლების განმავლობაში ვითარება რადიკალურად შეიცვალა, ამას დაემატა სუფსა და ყულევი, ახლა უკვე ანაკლიაც. ჩვენ ორი წლის განმავლობაში გავზარდეთ და კიდევ უფრო გავზრდით ქვეყნის ენერგეტიკულ პოტენციალს. იზრდება საქართველოს როგორც ტრანზიტორი ქვეყნის როლი. ასევე, მნიშვნელოვანია კავშირების დამყარება სამხრეთის ქვეყნებთანაც", - განაცხადა საქართველოს პრეზიდენტმა.
შეგახსენებთ, 2010 წლის 13 აპრილს ბუქარესტში, საქართველომ, აზერბაიჯანმა და რუმინეთმა ხელი მოაწერეს მემორანდუმს "გათხევადებული ბუნებრივი გაზის და მისი ტრანსპორტირების სფეროში თანამშრომლობის შესახებ~, რომელიც ითვალისწინებს საქართველოში გაზის გამათხევადებელი, ხოლო რუმინეთში რეგაზიფიკაციის ტერმინალების მშენებლობას.
პროექტის მიხედვით, გაზის გამათხევადებელი ტერმინალი საქართველოში, სავარაუდოდ, ყულევში აშენდება. პროექტის ღირებულება, წინასწარი გათვლებით, 4-6 მლრდ ევროს შეადგენს.
პროექტის თანახმად, საქართველოდან გათხევადებული გაზის რუმინეთში ტრანსპორტირება მოხდება. რუმინეთში გათხევადებული გაზი მიიღებს ისევ ბუნებრივი გაზის სახეს და შემდგომ ის განკუთვნილი იქნება ევროპული ქვეყნების მოთხოვნების დასაკმაყოფილებლად.
