"ჩვენ გვაქვს უნიკალური შანსი - ვიყოთ საქართველოსთვის, ვიბრძოლოთ საქართველოსთვის, თუ საჭიროა მოვკვდეთ საქართველოსთვის და გავიმარჯვოთ საქართველოსთვის! ამაზე დიდი პატივი ძალიან ცოტა თაობას ღირსებია საუკუნეების განმავლობაში", _ განაცხადა საქართველოს პრეზიდენტმა მიხეილ სააკაშვილმა ქუთაისში კადეტთა კორპუსის გახსნის საზეიმო ცერემონიალზე სიტყვით გამოსვლისას.
მისი განცხადებით, ის, რომ ავღანეთში ამდენი პრობლემაა, საქართველოსთვის ძალიან ცუდია, რადგანაც მთავარი საკითხებიდან ყურადღება გადადის.
"ი,ს რომ ავღანეთში ჩვენი ჯარისკაცები იბრძვიან, არის ჩვენი საერთო ბრძოლა. ვიღაცამ შეიძლება თქვას: ჩვენ ამდენი პრობლემა გვაქვს, ჩვენი ტერიტორიები დაპყრობილია, რა დროს სადღაც წასვლა და სადღაც ბრძოლაა. მაგრამ სწორედ იმის გამო, რომ ჩვენ გვაქვს ეს პრობლემები, გვჭირდება დიდი საბრძოლო გამოცდილება. ეს არის უნიკალური საბრძოლო სკოლა და საბრძოლო გამოცდილება ნამდვილი ომის გამოცდით", _ აცხადებს სააკაშვილი და დასძენს, რომ საქართველო არ არის არც ნორვეგიის, არც დანიისა და არც ავსტრალიის მდგომარეობაში.
"შეხედეთ ჩვენს პოზიციას, ჩვენს მდგომარეობას, ჩვენს გამოწვევებს, ჩვენს საფრთხეებს. შეგვიძლია თუ არა ვთქვათ შეიარაღებულ ძალებზე უარი და შეგვიძლია თუ არა ვთქვათ სამხედრო სკოლაზე უარი?!" _ განაცახდა სააკაშვილმა
მისი განცხადებით, ეს არის საშუალება რომ ჩვენი ჯარისკაცები ინტეგრირებულნი იყვნენ მსოფლიოს საუკეთესო ძალებთან.
"ვნახოთ ბოლო ტექნიკა, ბოლო მიღწევები და ვისწავლოთ ძალიან ბევრი რამ", _ განაცხადა პრეზიდენტმა.
