სააკაშვილმა ქართველი ოფიცრების ისტორიაზე საუბრისას, ალავერდ უნდილაძე, პეტრე ბაგრატიონი, მამელუკები და პოლონელი ოფიცრები გაიხსენა.

"ნამყოფი ვარ ირანის ძველ დიდებულ დედაქალაქში, ისპაჰანში, რომელიც აშენებულია არა ფრანგების, გერმანელების, არა თუნდაც სპარსელების უშუალო ხელმძღვანელობით, არამედ ალავერდ უნდილაძის და მისი ძმის მიერ. ალავერდ უნდილაძემ შაჰ-აბას I-ს მოუტანა აურაცხელი გამარჯვებები, ისტორიული დიდება ირანისა, ახალი ტერიტორიები, ის იყო დიდი მხედართმთავარი. სპარსეთის მეფის კარზე ბევრი დიდგვაროვანი საუბრობდა ქართულ ენაზე, მაგრამ იყო ერთი განსხვავება - უნდილაძე ემსახურებოდა საქართველოს დამპყრობელს, ამიტომ ის დარჩა ირანის ისტორიაში მეორეხარისხოვან ფიგურად და ვერ აისრულა მთავარი საწადელი - ვერ ემსახურა საქართველოს, _ განაცხადა სააკაშვილმა და სვა ქართველი მხედართმთავრები გაიხსენა:

"ყველაზე დიდი გენერალი მსოფლიოს ისტორიაში, ნაპოლეონი, ჯერ მიდის ეგვიპტეში, ამარცხებს ქართველი მამელუკებისგან დაკომპლექტებულ ეგვიპტის ლაშქარს, შემდეგ მოდის რუსეთში და პირველივე ბრძოლაში ბორძიკობს ქართველ გენერალ პეტრე ბაგრატიონთან შეტაკებაში. არც ერთი იყვნენ ეგვიპტელები, ვინც ნაპოლეონს ებრძოდნენ და არც მეორენი იყვნენ რუსები _ ისინი ორივე ბედკრული საქართველოს შვილები იყვნენ!" _ განაცხადა საქართველოს პრეზიდენტმა და შემდეგ პოლონეთში მყოფი ქართველი ოფიცრები გაიხსენა.

"ვარშავის ცენტრში მე გავხსენი ქართველი ოფიცრების ძეგლი. ისინი იყვნენ ქართველი ოფიცრები, რომლებიც საქართველოდან წავიდნენ ბოლშევიკების გამო. ისინი წაიყვანეს მარშალმა და პოლონეთის მთავარსარდალმა, მათ შეუნარჩუნდათ ოფიცრის წოდებები და შედეგად ქართველმა ოფიცრებმა მოახერხეს საქართველოში შემოსულ ბოლშევიკურ არმიაზე ბევრად უფრო მრავალრიცხოვანი არმიის დამარცხება. ბევრი ქართველი ოფიცერი დაწინაურდა, ბევრი მათგანი გამოცხადდა პოლონეთის ეროვნულ გმირად და გენერალი სუმბათაშვილი გახდა პოლონეთის გენერალური შტაბის ხელმძღვანელი", _ განაცხადა პრეზიდენტმა და აშშ-ის გენერალური შტაბის ყოფილი უფროსის ჯონ-მალხაზ შალიკაშვილის ღვაწლზე ისაუბრა.

პრეზიდებტის განცხადებით, ყველა მაგალითი მეტყველებს რომ კარგი ოფიცრები გვყავდა.