საქათველოში ბენზინის იმპორტის შემცირებას, ნავთობპროდუქტების იმპორტიორთა კავშირის თავმჯდომარე ვანო მთვრალაშვილი მოხმარების შემცირებას უკავშირებს.
მთვარალაშვილის განმარტებით, ბენზინის იმპორტის შემცირება განპირობებულია იმ ფაქტორით, რომ ავტომანქანების დიდი ნაწილი გადავიდა ბუნებრივი აირის მოხმარებაზე, რადგან ბუნებრივი აირით მანქანის გამართვა გაცილებით იაფი ჯდება.
"ყველაზე დაბალფასიანი საწვავის ფასი თუ შეადგენს 1.80 ლარს ლიტრაზე, ბუნებრივი აირით მანქანის ანალოგიური გამართვა მძღოლს უჯდება საშუალოდ 1,20 ლარი. ცნობისათვის, ბუნებრივი აირის მოხმარებაზე გადასვლა ტექნიკურად შეუძლიათ იმ სატრანსპორტო საშუალებებს, რომლებიც მოიხმარენ ბენზინის საწვავს. ამავდროულად ეს სატრანსპორტო საშუალებებია ტაქსები, გადამზიდავები, რომლებიც განსაკუთრებით დიდი ოდენობის საწვავს მოიხმარენ"- განაცხადა ვანო მთვრალაშვილმა.
სტატისტიკური ინფორმაციის თანახმად, 2010 წლის რვა თვეში საქართველოში 479 800 ათასი ტონა ბენზინისა და დიზელის საწვავის იმპორტი განხორციელდა, საიდანაც 227 900 ათასი ტონა ბენზინი და 251 900 ათასი ტონა დიზელის საწვავი იყო..
გასული წლის ანალოგიურ პერიოდში ნავთობპროდუქტების (ბენზინი, დიზელი) იმპორტმა 522 600 ათასი ტონ შეადგინა ა. კერძოდ, ბენზინი - 290 830 ათასი ტონა და დიზელის საწვავი - 231 760 ათასი ტონა.
შედეგად, მიმდინარე წლის პირველი რვა თვის განმავლობაში საქართველოში ნავთობპროდუქტების (ბენზინი, დიზელი) იმპორტი გასული წლის ანალოგიური პერიოდის მაჩვენებელთან შედარებით შემცირდა 42 800 ათასი ტონით. ძირითადად შემცირებულია ბენზინის იმპორტი, კერძოდ, 62 980 ათასი ტონით, ხოლო დიზელის საწვავის იმპორტი გაზრდილია 20 000 ათასი ტონით.
იმპორტირებულ ბენზინში ყველაზე დიდი წილი უკავია რეგულარი A-92 ტიპის საწვავს - მ/წლის რვა თვის განმავლობაში 179 560 ათასი ტონა ანუ 79,5 პროცენტი, პრემიუმის ტიპის A -95 ტიპის საწვავს - 41 900 ათასი ტონა ანუ 18 პროცენტი და სუპერი ტიპის A -98 ტიპის საწვავს - 6 400 ათასი ტონა ანუ 2,5 პროცენტი.