12 სექტემბერს, ილია ჭავჭავაძის მკვლელობიდან 103 წლისთავი სრულდება. საგურამოს ი .ჭავჭავაძის სახლ_მუზეუმის ხელმძღვანელობის ინიციატივითა და მცხეთა-მთიანეთის სამხარეო ადმინისტრაციის თანადგომით, აღნიშნულ ფაკტთან დაკავშირებით ღონისძიება იგეგმება. 13.00 საათზე, წიწამურში, ილიას მკვლელობის ადგილზე აღმართულ ობელისკთან, მწერლის სულის მოსახსენებელი პარაკლისი გაიმართება, რომლის შემდგომ, იქ მოწვეული საზოგადოება, მწერლები და საზოგადო მოღვაწენი საგურამოს სახლ-მუზეუმში გადაინაცვლებენ, სადაც მათ საშუალება მიეცემათ კიდევ ერთხელ გაიხსენონ ამ ბუმბერაზი ადამიანის ცხოვრება და მოღვაწეობა.
მოხდება ასევე მწერლების: ზვიად კვარაცხელიას წიგნის "ილია სამეგრელოში" და იონა მეუნარგიას - "თხზულებათა მრავალტომეულის I ტომის" პრეზენტაცია.
გარდა ამისა, საპატიო წოდება "ილიას საგურამოს მუზეუმის მეგობარი" მიენიჭებათ იმ ბიზნესმენთა წრის წარმომადგენლებს, რომლებსაც ამაგი მიუძღვით აღნიშნული მუზეუმის სხვადასხვა სახით დახმარებაში.
საღამოს დაამშვენებენ ანსამბლების : "ქართული ხმებისა" და "ერისიონის" სოლისტების შემოქმედება. ღონისძიებას დაესწრებიან ლიტერატურისა და კულტურის სფეროს წარმომადგენლები და სხვა მოწვეული სტუმრები.