კუბის ყოფილი ლიდერის ფიდელ კასტროს განცხადებით, კუბის ეკონომიკური მოდელი აღარ მუშაობს და სახელმწიფომ თავის ეკონომიკურ სტრატეგიას უნდა გადახედოს. ამის შესახებ ფიდელ კასტრომ ამერიკელი ჟურნალისტის, ჯეფრი გოლდბერგისთვის მიცემულ ინტერვიუში განაცხადა.
"კუბის ეკონომიკური მოდელი აღარ მუშაობს და სახელმწიფომ უნდა გადახედოს თავის როლს ქვეყნის ეკონომიკის მართვაში", - აღნიშნა კასტრომ და დასძინა, რომ ქვეყანაში უფრო მეტ კერძო საწარმოს უნდა მიეცეს მუშაობის საშუალება. ასევე, ყოფილი კომენდანტის თქმით, ფერმერებს უფრო მეტი ეკონომიკური თავისუფლება ესაჭიროებათ.
აღნიშნული განცხადებებით, ფიდელ კასტრომ გააქარწყლა ეჭვი იმის თაობაზე, რომ მასსა და მის ძმას, რაულ კასტროს შორის, რომელიც ქვეყნის ამჟამინდელი პრეზიდენტია, ეკონომიკურ საკითხებზე აზრთა სხვადასხვაობა არსებობდა. როგორც ცნობილია, კუბაში კერძო სექტორის წამოწევის შესახებ განცხადება თავდაპირველად სწორედ რაულ კასტრომ გააკეთა. ამის შემდგომ, ამერიკულ პრესაში მუსირებდა აზრი, რომ ფიდელ კასტრო საკუთარ ძმას არ ეთანხმებოდა და კვლავ კომუნისტურ ეკონომიკურ მოდელს უჭერდა მხარს.
შეგახსენებთ, რომ ფიდელ კასტრო კუბას 1959 წლის დეკემბრიდან, 2008 წლამდე ხელმძღვანელობდა. ამის შემდეგ, კი ჯანმრთელობის გაუარესების გამო, მან ქვეყნის მეთაურის თანამდებობა თავის ძმას, რაულ კასტროს გადააბარა. რამდენიმე წლის განმავლობაში კასტრო ტელევიზიით არ გამოჩენილა, თუმცა მიმდინარე წელს მან რამდენიმე გადაცემაში მონაწილეობა მიიღო, ყოფილმა კომენდანტმა თავისი ახალი წიგნი - "სტრატეგიული გამარჯვებაც" გამოაქვეყნა.
