"ჭეშმარიტი რეალიების გათვალისწინების გარეშე შედგენილი პროექტი, მორიგი ქართული წამოწყების კონტრპროდუქტიულობა, რომლის შედეგებმაც, შესაძლოა, ჟენევის საერთაშორისო მოლაპარაკებებს დაარტყას", _ ასე ეხმაურება რუსეთის საგარეო საქმეთა სამინისტრო გაეროს გენერალური ასამბლეის მიერ მიღებულ რეზოლუციას და ამასთან დაკავშირებით განცხადებას ავრცელებს.

"მორიგი ქართული წამოწყების კონტრპროდუქტიულობა ეჭვგარეშეა. აღნიშნული, კენჭისყრის შედეგებმაც დაადასტურა: პროექტს მხარი გაეროს წევრი სახელმწიფოების მეოთხედზე ოდნავ მეტმა დაუჭირა, რაც თავის მხრივ კითხვის ნიშნის ქვეშ აყენებს თბილისის მტკიცებას მათი პოზიციის უნივერსალური მხარდაჭერის შესახებ, _ ნათქვამია სერგეი ლავროვის უწყების მიერ გავრცელებულ განცხადებაში და ასევე აღნიშნულია, რომ ამ დოკუმენტს არაფერი საერთო არა აქვს დევნილთა მდგომარეობასთან დაკავშირებულ თეზისებთან და მაღალ ჰუმანიტარულ მიზნებთან, რომელთა შესახებაც მისი ავტორები საუბრობენ - "შესაბამისად იგი არანაირად არ უწყობს ხელს პრობლემის დარეგულირებას", _ წერს რუსეთის საგარეო უწყება.

მათივე განცხადებით, - "ცხადია, რომ პროექტის ავტორებმა იგი იმ რეალიების გათვალისწინების გარეშეE შეადგინეს, რომელიც სწორედ მათ მიერვე გატარებული ავანტიურისტული პოლიტიკის შედეგად შეიქმნა. ეს რეალიები კი შემდეგში მდგომარეობს - უკვე ორი წელიწადია რაც არსებობს ორი დამოუკიდებელი სახელმწიფო აფხაზეთი და სამხრეთ ოსეთი და ამის გათვალისწინება კი როგორც საქართველოს ხელისუფლებას ისე მათ დასავლელ მფარველებს ადრე თუ გვიან მოუწევთ".

"ჭეშმარიტად არსებული მდგომარეობის საწინააღმდეგოდ შედგენილ პროექტში აფხაზეთისა და სამხრეთ ოსეთის საქართველოსადმი კუთვნილების თეზისია წარმოდგენილი. ეს ასახულია როგორც რეზოლუციის სათაურში ისე "ყველა დევნილის უფლების დადასტურებაში დაბრუნდნენ საქართველოს ტერიტორიაზე არსებულ თავიანთ სახლებში". რუსულმა დელეგაციამ ამ ტენდენციურ რეზოლუციას მხარი არ დაუჭირა", _ აცხადებს რუსეთის საგარეო უწყება და აღნიშნავს, რომ "მთლიანობაში, მიგვაჩნია, რომ გაეროს გენერალურ ასამბლეაზე შემდგარი კენჭისყრა და მისი შედეგები ისედაც მძიმე მდგომარეობაში მყოფ ჟენევის საერთაშორისო დისკუსიებს დაარტყამს", _ აცხადებს რუსეთის საგარეო საქმეთა სამინისტრო.
შეგახსენებთ, რომ გაეროს გენერალურმა ასამბლეამ აღიარა "ყველა იძულებით გადაადგილებული პირის და დევნილის და მათი შთამომავლების უფლებები, ეთნიკური კუთვნილების მიუხედავად, საქართველოს მთელ ტერიტორიაზე, მათ შორის აფხაზეთში და სამხრეთ ოსეთში საკუთარ სახლებში დაბრუნების თაობაზე".
ასამბლეაზე მიღებულ იქნა რეზოლუცია "აფხაზეთიდან, საქართველო, და ცხინვალის რეგიონიდან / სამხრეთ ოსეთი, საქართველო, იძულებით გადაადგილებულ პირთა და დევნილთა მდგომარეობის შესახებ".
რეზოლუციაში გამოხატულია შეშფოთება კონფლიქტების შედეგად საქართველოში დემოგრაფიული სიტუაციის ძალისმიერი შეცვლის შესახებ.
ასამბლეის მიერ მიღებულ რეზოლუციაში ხაზგასმულია კონფლიქტის შედეგად დაზარალებულ, იძულებით გადაადგილებულ პირთა და დევნილთა ქონებრივი უფლებების დაცვის აუცილებლობა და აღნიშნულია მათი საკუთრების შეძენაზე თავის შეკავების შესახებ.
რეზოლუციაში აღნიშნულია, რომ გენერალური ასამბლეა დემოგრაფიული ვითარების ძალისმიერად შეცვლას დაუშვებლად მიიჩნევს.
კენჭისყრის მიხედვით რეზოლუციას მხარი დაუჭირა 50 სახელმწიფომ, წინააღმდეგ მისცა ხმა 17-მა, ხოლო 86-მა სახელმწიფომ კენჭისყრაში მონაწილეობისგან თავი შეიკავა.