კინოთეატრი “რუსთაველის” გადასარჩენად ხელმოწერები გროვდება. შესაბამისი პეტიცია უკვე გამოქვეყნდა. ადრესატი: საქართველოს მთავრობა , თბილისის მერია, კულტურისა და ძეგლთა დაცვის სამინისტრო, კინემატოგრაფიის ეროვნულ ცენტრი.
პეტიციით მოთხოვნილია, 1939 წელს აშენებულ ისტორიულ შენობაში, რომელიც გახსნის დღიდან, როგორც კინოთეატრი, ისე ფუნქციონირებდა, პირველი მუნიციპალური კინოთეატრი დაფუძნდეს.
„საქართველოს მოქალაქეები და კინოსპეციალისტები მუნიციპალური კინოთეატრის შექმნის მოთხოვნით მოგმართავთ. მოგახსენებთ, რომ მსოფლიოს უამრავ სახელმწიფოში მუნიციპალური კინოთეატრები ქვეყნის ბიუჯეტიდან ფინანსდება. ამჟამად ბიუჯეტიდან თანხა მხოლოდ ფილმწარმოებაზე გამოიყოფა, მაგრამ სახელმწიფო არ ზრუნავს გადაღებული ფილმების ხელმისაწვდომობაზე. კომერციულ კინოთეატრებში ბილეთის ფასი საკმაოდ მაღალია, რის გამოც, ქართული ფილმები ჰოლივუდისა და ევროპის მსხვილი კომპანიების პროდუქციას კონკურენციას ვერ უწევენ.
საქართველოს კომერციული კინოთეატრების პროგრამებში, როგორც წესი, აგრეთვე არ ხვდება ევროპული და მსოფლიო კინოს მაღალი მხატვრული ღირებულების მქონე ფილმები. არსებობს გამონაკლისები, თუმცა, ამ შემთხვევაშიც, ბილეთის მაღალი საფასურის გამო, საავტორო კინოსა და ე.წ. არტჰაუსს მაყურებელი არ ჰყავს. ამ მხრივ, კიდევ უფრო სავალალო მდგომარეობა რეგიონებშია, სადაც კულტურული ცხოვრება თითქმის გაჩერებულია. არსებულ მდგომარეობას, ყველაზე ნაკლები დანახარჯით, სწორედ მუნიციპალური კინოთეატრები შეცვლის. ამ მიმართულებით პირველი ნაბიჯის გადადგმა კი უკვე შეიძლება.
საქართველოს მთავრობას შემუშავებული აქვს ყველა სახელოვნებო მიმართულების დოტაციის პოლიტიკა, გარდა კინოინდუსტრიისა. სწორედ სახელმწიფოს ინტერესებში შედის, ან უნდა შედიოდეს, ისეთი კულტურული დაწესებულების არსებობა და განვითარება, რომელიც მომართული იქნება მაყურებელს ხელმისაწვდომ ფასადშესთავაზოს როგორც თანამედროვე ქართული და მსოფლიო კინო, აგრეთვე კინოკლასიკა, რეტროსპექტივები, სპეციალური კვირეულები, გამოფენები, ფესტივალები. ასეთი სივრცე ხელსაყრელი იქნება საგანმანათლებლო პროგრამებისთვის − ვორკშოპების, მასტერკლასებისა და სხვა მსგავსი ტიპის შეხვედრებისთვის.
თავის დროზე უსამართლო პირობებით გასხვისებული კინოთეატრი “რუსთაველი” ამჟამად დახურულია. ამრიგად, თუკი სახელმწიფო ინიციატივას გამოიჩენს, კერძო სექტორთან თანამშრომლობით, შესაძლებელი გახდება პირველი მუნიციპალური კინოთეატრის დაფუძნება იმავე, 1939 წელს აშენებულ ისტორიულ შენობაში, რომელიც, გახსნის დღიდან, როგორც კინოთეატრი, ისე ფუნქციონირებდა“, - ნათქვამია პეტიციაში.
