ვიდრე მთავრობა შაორის ტბაზე ინვესტორებს მოიზიდავს და იქ სათანადო ინფრასტრუქტურას მოაწყობს, ქართული კომპანიები ტბის მიმდებარე ტერიტორიაზე ტურისტების მიზიდვას თავად იწყებენ და ინფრასტრუქტურის შექმნასაც საკუთარი სახსრებით ახორციელებენ.
ტურისტულმა კომპანია "შაორმა" შაორის ტბის მიმდებარე ტერიტორიაზე ოპერირება უკვე დაიწყო და დასვენების მსურველებს 7 დღიან პაკეტს 210 ლარად სთავაზობს.
ერთკვირიან ტურისტულ პაკეტში სამჯერად კვებასთან ერთად წყლის ველოსპედებით 1-საათიანი უფასო გასეირნება და რაჭაში უფასო ექსკურსიებიც შედის.
როგორც სააგენტო "ჯი-ეიჩ-ენს" კომპანია "შაორის" ხელმძღვანელმა რომან კობახიძემ განუცხადა, ტურისტებს ღამის გათევა კომფორტულ კარვებში შეუძლიათ და 2 თვის განმავლობაში ამ სერვისით უკვე 160 ტურისტმა ისარგებლა, საიდანაც 60 % ქართველი, ხოლო 40% უცხოელი ტურისტი იყო.
უახლოეს ხანებში, კომპანია საკუთარ კლიენტებს ტბაზე ნავით გასეირნების სერვისსაც შესთავაზებს. აღნიშნული ნავის შესაძენად კომპანიამ 700 ლარი ხარჯი გასწია და მთლიანობაში შაორის ტბასთან შესაბამისი ინფრასტრუქტურის მოსაწყობად 20 ათასი ლარის ინვესტიცია განახორციელა.
შეგახსენებთ, რომ შაორის ტბის მიმდებარე ტერიტორიაზე ინფრასტრუქტურის განვითარებას საქართველოს მთავრობა 2007 წლიდან გეგმავს. ამ ადგილის ტურისტებისთვის მიზიდველ ადგილად ქცევა და შესაბამისი ინფრასტრუქტურის მოწყობის იდეია ექს ეკონომიკის მინისტრს გიორგი არველაძეს ეკუთვნის. თუმც ამ დრომდე რელური ინვესტორის პოვნა ვერ მოხერხდა.
აღსანიშნავია, რომ კურორტის მშენებლობის გენერალური გეგმა კომპანია "გეოგრაფიკმა" შეიმუშავა, რომლის თანახმადაც შაორის მიმდებარედ 700 ჰექტარი მიწის ნაკვეთის განაშენიანება იგეგმებოდა, საიდანაც 300 ჰექტარზე პატარა ქალაქი უნდა აშენებულიყო. პროექტის თანახმად ტბასთან 2,5 კმ სიგრძის ასაფრენი ბილიკი და მცირე აეროდრომე უნდა მოწყობილიყო.
2010 წლის თებერვალში ეკონომიკური განვითარების ყოფილი მინისტრის ზურაბ პოლოლიკაშვიკლის მოწვევით საქართველოში ეგვიპტელი ინვესტირები იმყოფებოდნენ, რომლებმაც შაორის ტბის მიმდებარე ტერიტორია მოინახულეს.