„ომეგა ჯგუფის“ საწარმო კვლავ გაჩერებულია და 1 500-მდე პირი სამსახურის გარეშეა დარჩენილი, - ამის შესახებ კომპანიის გენერალურმა დირექტორმა ლევან აღდგომელაშვილმა პრესკონფერენციაზე განაცხადა.
მისი თქმით, საწარმო ფინანსთა სამინისტროსგან აქციზური მარკების მიღებას კვლავ ვერ ახერხებს, რის გამოც კომპანიის ფუნქციონირება მორიგ ჯერზე შეჩერდა.
აღდგომელაშვილის განცხადებით, კომპანიამ აქციზური მარკებისთვის საჭირო ინვოისის მოთხოვნა 12 ნოემბერს დააფიქსირა, თუმცა ის არ დაკმაყოფილდა, ხოლო რამდენიმე წერილზე პასუხი საერთოდ არ მიუღია.
„კომპანიამ 2018 წლის 8 ნოემბერს, ანუ კანონმდებლობით განსაზღვრულ ვადამდე ერთი კვირით ადრე, სრულად დაფარა ოქტომბრის თვის საანგარიშო პერიოდზე კუთვნილი მიმდინარე გადასახადი 550 000 ლარის ოდენობით. მიმდინარე წლის 12 ნოემბერს კომპანია "ოჯთ"-მ შემოსავლების სამსახურის ვებგვერდზე განათავსა შეკვეთა, რომლითაც მოითხოვა ადგილობრივი უფილტრო სიგარეტის აქციზური მარკები. აღნიშნული შეკვეთა შემოსავლების სამსახურმა დაადასტურა იმავე დღეს, 11:29 საათზე. მომდევნო დღეების განმავლობაში, ინტენსიურად ვუკავშირდებოდით როგორც ფინანსთა მინისტრის მოადგილე მიხეილ დუნდუას, ისე გადამხდელთა სამსახურის დეპარტამენტის და შპს "სიქპა სიქურითი სოლუშენს ჯორჯიას", რომელიც შემოსავლების სამსახურის კონტრაქტორი კომპანიაა და ევალება აქციზური მარკების გაცემა, წარმომადგენლებს. ვითხოვდით, რომ დროულად მოეცათ ინვოისი, რათა მოგვცემოდა საშუალება, რომ გადაგვეხადა შეკვეთილი აქციზური მარკების ნომინალური ღირებულება, რის შემდეგაც მივიღებდით აქციზურ მარკებს. თუმცა შპს "სიქპა სიქურითი სოლუშენს ჯორჯიას" წარმომადგენელი გვპასუხობდა, რომ ეს საკითხი მათ დამატებით უნდა შეეთანხმებინათ შემოსავლების სამსახურის ხელმძღვანელებთან, ვინაიდან, როგორც ისინი აცხადებდნენ, შეიცვალა პროცედურა და საჭირო გახდა შემოსავლების სამსახურის დამატებითი დადასტურება. შეგახსენებთ, რომ ეს შეკვეთა შემოსავლების სამსახურს ერთხელ უკვე ჰქონდა დადასტურებული 12 ნოემბერს. ამგვარად, აბსოლუტურად გაუგებარია, რომელი ნორმატიული აქტის საფუძველზე იყო საჭირო ერთხელ უკვე დადასტურებული შეკვეთის ხელმეორედ დადასტურება შემოსავლების სამსახურის მიერ“, - განაცხადა მან.
მისივე განცხადებით, 27 ნოემბერს, წერილობით მიმართეს შემოსავლების სამსახურის გადამხდელთა მომსახურების დეპარტამენტს და ითხოვეს განემარტათ, თუ რატომ არ ეძლეოდათ მოთხოვნილი აქციზური მარკების ნომინალური ღირებულების გადასახდელი ინვოისი. მისი თქმით, 30 ნოემბერს, შპს „სიქპა სიქურითი სოლუშენს ჯორჯია“-სგან მიიღეს ელექტრონული შეტყობინება, რომლის თანახმად, „ომეგა ჯგუფის“ შეკვეთას, რომელიც იყო დადასტურებული, შეეცვალა სტატუსი და გახდა „გადაუხდელი - გაუქმებული“. მისი განცხადებით, კომპანიას არ მიუღია აქციზური მარკები იმის გამო, რომ არაერთგზის მოთხოვნის მიუხედავად, შემოსავლების სამსახურმა და შპს "სიქპა სიქურითი სოლუშენს ჯორჯიამ", გაურკვეველი მიზეზით, შპს "ოჯთ"-ს განზრახ არ მიაწოდეს ინვოისი შეკვეთილი აქციზური მარკების ნომინალური ღირებულების გადასახდელად. მისი მტკიცებით, სწორედ ამას მოჰყვა „სიქფა სექურითი სოლუშენს ჯორჯია“-ს მიერ შეკვეთის გაუქმება.
აღდგომელაშვილის განცხადებით, 3 დეკემბერს, კომპანიამ კვლავ განათავსა ახალი შეკვეთა ადგილობრივი უფილტრო სიგარეტის აქციზურ მარკებზე. მისი თქმით, ამ ახალი შეკვეთის ამჟამინდელი სტატუსია „შეკვეთა შექმნილია“. მისივე განცხადებით, ახალი შეკვეთის დადასტურება ან უარყოფა ჯერ არ მომხდარა. მისივე თქმით, ეჭვგარეშეა, რომ შემოსავლების სამსახური და მისი კონტრაქტორი „სიქფა სიქურითი სოლუშენს ჯორჯია“ მოქმედებენ შეთანხმებულად და მიზანმიმართულად, რათა „ომეგა ჯგუფს“ არ მიეცეს საშუალება კანონით დადგენილი წესით შეიძინოს წარმოებისათვის საჭირო აქციზური მარკები.
მისივე განცხადებით, კომპანიამ 3 დეკემბერს, წერილობით კიდევ ერთხელ მიმართა ფინანსთა სამინისტროს და მოითხოვა, რომ დაუყოვნებლივ იქნას აღმოფხვრილი „ომეგა ჯგუფის“ წინააღმდეგ მიმდინარე უკანონო ქმედებები. მისივე თქმით, წინააღმდეგ შემთხვევაში, „ომეგა ჯგუფი“ იტოვებს უფლებას, გამოიყენოს ყველა შესაძლო სამართლებრივი საშუალება, რათა მოითხოვოს კანონის დამრღვევი ყველა პირის მიმართ სამართლებრივი პასუხისმგებლობის დაყენება და კომპანიისათვის მიყენებული ზიანის სრულად ანაზღაურება.
