17-29 ოქტომბერს საქართველოში ვიზიტით იმყოფებოდა სსფ-ს მისია მერსედეს ვერა მარტინის ხელმძღვანელობით. მისიის მიზანი სსფ-ს მიერ 'გაფართოებული დაფინანსების მექანიზმით' მხარდაჭერილი პროგრამის მიმდინარეობის მესამე მიმოხილვა იყო. პროგრამა მხარს უჭერს საქართველოს ამბიციურ რეფორმების გეგმას.
სსფ-ს მისიასა და საქართველოს ხელისუფლებას შორის მიღწეულია შეთანხმება საქართველოში მიმდინარე პროგრამის მესამე მიმოხილვის წარმატებით დასრულების შესახებ. მისიის წინასწარი შედეგები სსფ-ს აღმასრულებელ დირექტორთა საბჭოს 2018 წლის დეკემბერში წარედგინება. მიმოხილვის დასრულებისას საქართველოსთვის ხელმისაწვდომი გახდება 41, 6 მლნ აშშ დოლარი.
საერთაშორისო სავალუტო ფონდის მისია სრულად იზიარებს და მხარს უჭერს ეროვნული ბანკის მონეტარულ პოლიტიკას. სსფ-ს მისის ხელმძღვანელის მერსედეს ვერა მარტინის განცხადებით „რეფორმების პროგრამა წარმატებით მიმდინარეობს. მესამე მიმოხილვის დასასრულებლად საჭირო კრიტერიუმების უმრავლესობა შესრულებულია. მონეტარული პოლიტიკა შესაფერისია და მართებულადაა მიმართული ფასების სტაბილურობის უზრუნველყოფაზე. მოსალოდნელია, რომ 2018-2019 წლებში წლიური ინფლაცია ეროვნული ბანკის 3 პროცენტიან მიზნობრივ მაჩვენებელთან ახლოს შენარჩუნდება. გაცვლითი კურსის მოქნილობის შენარჩუნება უაღრესად მნიშვნელოვანია საქართველოს დასაცავად საგარეო შოკებისგან. ეკონომიკის ზრდაზე უარყოფითი გავლენის მქონე რისკები გაზრდილია. საპასუხოდ, მეტ მნიშვნელობას იძენს გაცვლითი კურსის მოქნილობა, ბუფერების/რეზერვების შევსებაზე მიმართული, გონივრული მონეტარული და ფისკალური პოლიტიკის გატარება და ჯანსაღი პოლიტიკა ფინანსურ სექტორში. ფინანსური სექტორის რეფორმები კვლავაც მიმართული უნდა იყოს ფინანსური მდგრადობის გაძლიერებაზე. ფიზიკურ პირთა ჯანსაღი დაკრედიტების მიმართულებით შეთავაზებული რეგულაციის მიზნები მართებულია ჭარბი ვალის ტვირთისგან ფიზიკურ პირთა დასაცავად და ფინანსური სტაბილურობის რისკების შესამცირებლად. დოლარიზაციის შემცირება უნდა გაგრძელდეს მიზანმიმართული და ბაზარზე ორიენტირებული პრუდენციული ღონისძიებებით, რომლებიც ითვალისწინებს არაჰეჯირებულ მსესხებლებზე უცხოური ვალუტით სესხის გაცემის რისკებს, და ფინანსური განათლებისა და მომხმარებელთა დაცვის გზით." - განცხადა სსფ-ს მისის ხელმძღვანელმა.
