ლევან ყიფიანს დაესვა ყველა ის კითხვა, რაც გამოძიებას აინტერესებდა. მოწმემ ამომწურავად უპასუხა აღნიშნულ კითხვებს, - ამის შესახებ ჟურნალისტებთან პროკურორმა გიორგი ოსაძემ ყოფილი მინისტრის, ლევან ყიფიანის გამოკითხვის შემდეგ განაცხადა.
მისივე განმარტებით, ყიფიანმა გამოძიებას მნიშვნელოვანი ინფორმაცია მიაწოდა.
"მოგვაწოდა საკმაოდ მნიშვნელოვანი ინფორმაცია, მათ შორის მიუთითა იმ გარემოებების თაობაზე, თუ რა ვითარებაში და როგორ მოხდა გავრცელებული ჩანაწერების დამზადება და შემდგომ გავრცელება.
გარდა ამისა, მოწმეს დაესვა შეკითხვები თანხების დანიშნულებასა და მიზნობრიობასთან დაკავშირებით და აღნიშნულის თაობაზე მოწმემ გამოძიებას მიაწოდა ინფორმაცია. ჩვენების კონკრეტულ შინაარსზე, გამოძიების ინტერესებიდან გამომდინარე ვერ ვისაუბრებ“, - განაცხადა ოსაძემ.
კითხვაზე, გამოიკითხებიან თუ არა, ყოფილი მთავარი პროკურირი, ოთარ ფარცხალაძე, ან ჩანაწერში გაჟღსრებული კიდევ ერთი პირი - ბიძინა ივანიშვილი, პროკურორი კონკრეტულად არ პასუხობს.
"ვინაიდან საქმეზე მიმდინარეობს გამოძიება, ყველა ის პირი, ვინც შესაძლოა ფლობდეს ინფორმაციას გამოსაძიებელ სისხლის სამართლის საქმეზე, დაიკითხება გამოძიების მიერ. მათ შორის დაიკითხება ზაზა ოქუაშვილი, რომელსაც ჩაბარებული აქვს უწყება არაერთხელ.
ჩვენ ასევე დანიშნული გვაქვს აუდიოჩანაწერებზე ექსპერტიზა. იქიდან გამომდინარე, რომ ყოველდღიურად ახალ-ახალი აუდიოჩანაწერები ვრცელდება, კონკრეტული ვადა თუ როდის იქნება ექსპერტიზის დასკვნები, განსაზღვრული არაა", - აცხადებს ოსაძე.
