არ არსებობს მათი პატიმრობის საფუძველი, - ამის შესახებ კომპანია "სვეტის" დაკავებული ხელმძღვანელი პირების ადვოკატმა ვალერი გელბახიანმა განაცხადა.
მისივე განცხადებით, ის ფიქრობს, რომ „სვეტის“ დამფუძნებლის, გივი ჯიბლაძისა და ამავე კომპანიის დირექტორის, თორნიკე ჯანელიძის მხრიდან თაღლითობას ადგილი არ უნდა ჰქონდეს.
"გამოძიება მიმდინარეობს უკვე რამდენიმე თვეა. დაახლოებით საქმის კურსში ვარ იმ პრეტენზიებთან დაკავშირებით, რაც გამოძიებას ჰქონდა კომპანია "სვეტის", მისი დამფუძნებლისა და დირექტორის მიმართ. დღემდე გამოკვეთილი ბრალეულობა არ იყო, უბრალოდ იყო კითხვები, რაზეც გამოძიებას პასუხი გაეცა. დღეს გავიგეთ, რომ დაკავებულები არიან გივი ჯიბლაძე და თორნიკე ჯანელიძე.
ჩემი აზრით, თაღლითობას ადგილი არ უნდა ჰქონდეს. მე კითხვები მაქვს, როდესაც ისინი მოწმის სახით იკითხებოდნენ, მე მათი ადვოკატი ვიყავი. ისინი ადვოკატის მონაწილეობის გარეშე არ უნდა დაეკავებინათ. კანონმდებლობით გათვალისწინებული ნორმები არ ყოფილა დარღვეული და ისინი ცხადდებოდნენ საგამოძიებო უწყებაში. არ არსებობდა ისეთი გარემოება, რომელიც აუცილებელს ხდიდა მათ დაკავებას.
დარწმუნებული ვარ, ახლა გამოძიება აღმკვეთი ღონისძიების სახედ მათ დაკავებას მოითხოვს. არ არსებობს მათი პატიმრობის საფუძველი", - განაცხადა ადვოკატმა.
ცნობისთვის, საქართველოს ფინანსთა სამინისტროს საგამოძიებო სამსახურის თანამშრომლებმა, სასამართლოს განჩინების საფუძველზე მიმდინარე წლის 3 ოქტომბერს, საქართველოს სისხლის სამართლის კოდექსის 180-ე მუხლის მე-3 ნაწილით გათვალისწინებული დანაშაულის (თაღლითობა, სამსახურებრივი მდგომარეობის გამოყენებით დიდი ოდენობით მართლსაწინააღმდეგო მისაკუთრების მიზნით სხვისი ნივთის დაუფლება მოტყუებით) ჩადენისათვის სამშენებლო კომპანია ,,სვეტის“ ხელმძღვანელი პირები - გ.ჯ. და თ. ჯ. დააკავეს.
