2018 წლის აგვისტოში, ელექტროენერგიის მოხმარების ზრდის ტემპი შედარებით შენელდა.  Galt & Taggart-ის ანგარიშის მიხედვით, თუ  მაისი-ივლისის პერიოდში, ელექტროენერგიის მოხმარება წლიურად საშუალოდ 11.8%-ით იზრდებოდა, აგვისტოში ზრდამ მხოლოდ 1.0% შეადგინა. დაბალი ზრდა შესაძლოა აიხსნას წინა წლის მაღალი ბაზით და შედარებით დაბალი ტემპერატურით, რაც კონდიციონერების მოხმარებას შეამცირებდა. 2018 წლის 8 თვეში ჯამურად ელექტროენერგიის მოხმარება 7.7% -ით გაიზრდა. 

პირდაპირი მომხმარებლების მიერ გამოყენებული ელექტროენერგიის მოცულობა წლიურად 24.4%-ით გაიზარდა, რაც მაისში ამოქმედებული საკანონმდებლო ცვლილებებიდან გამომდინარე პირდაპირი მომხმარებლების ჯგუფში ახალი კომპანიების დამატებამ გამოიწვია.

დისტრიბუციის ლიცენზიანტების მოხმარება წლიურად 3.1% შემცირდა, რაც ზემოთაღნიშნულ საკანონმდებლო ცვლილებს და კლიმატურ პირობებს უკავშირდება. თუმცა აღსანიშნავია, რომ ამ მიზეზებით გამოწვეული კლება სადისტრიბუციო  ქსელებში  ნაწილობრივ დააკომპენსირეს ახალმა კომერციულმა და სამომხმარებლო აბონენტებმა. 

არსებული დეფიციტის გამო ელექტროენერგიის ექსპორტი 2018 წლის აგვისტოში არ განხორციელებულა. ზოგადად, აგვისტო ითვლება საექსპორტო თვედ, თუმცა 2015-17 წლებშიც საშუალოდ ძალიან მცირე მოცულობის ექსპორტი ხორციელდებოდა.