2018 წელს ელექტროენერგიის მოხმარების 9.9%-იანი ზრდაა მოსალოდნელი. როგორც Galt & Taggart-ის ანგარიშშია აღნიშნული, ეკონომიკისა და მდგრადი განვითარების სამინისტრომ განაახლა 2018 წლის ელექტროენერგიის (სიმძლავრის) საპროგნოზო ბალანსი. განახლებულ დოკუმენტში გაზრდილია ელექტროენერგიის მოხმარების საპროგნოზო მაჩვენებელი (3 პროცენტული პუნქტით) და ამ ზრდის პროპორციულად იმპორტის და თბოგენერაციის მოცულობები. განახლებული ბალანსის მიხედვით, 2018 წელს ელექტროენერგიის მოხმარების პროგნოზია 13.0 ტვტ.სთ. აღნიშნული მოხმარება გულისხმობს წლიურ 9.9%-იან ზრდას, რაც 2010 წლის შემდგომ ყველაზე მაღალი მაჩვენებელია. გაზრდილ მოხმარებას თბოგენერაცია და იმპორტი დააკმაყოფილებენ. გეგმის მიხედვით, იმპორტის მოცულობა შარშანდელ ისტორიულ მაქსიმუმს მიუახლოვდება. გარდა ამ ცვლილებებისა, განახლებული ბალანსი აგრეთვე ითვალისწინებს პირდაპირ მომხმარებლებთან დაკავშირებით მაისში მიღებულ საკანონმდებლო ცვლილებებს და ასევე ასახულია 2018 წლის პირველი 7 თვის ფაქტიური მაჩვენებლები.
