ხორავას ქუჩაზე მომხდარი მკვლელობის საქმეზე ერთ-ერთი მსჯავრდებულის, გ.ჯ.-ს ადვოკატი, ტარიელ კაკაბაძე აცხადებს, რომ რამდენიმე დღეში ბრიტანელი ექსპერტების დასკვნას მიიღებენ, რომელსაც სააპელაციო სასამართლოში წარადგენენ.
"როგორც ჩვენთვის ცნობილია, დღეს ბრალდების მხარე აპირებს ახალი მტკიცებულებების თაობაზე შუამდგომლობის დაყენებას. კონკრეტულად, აპირებენ ახალი მტკიცებულებების დართვა მოითხოვონ კონკრეტული სისხლის სამართლის საქმეზე.
ჩვენ გავეცნობით ამ შუამდგომლობას, ახალ მტკიცებულებებს და შემდეგ ჩამოვაყალიბებთ ჩვენს პოზიციას.
რაც შეეხება დაცვის მხარის მტკიცებულებებს, მინდა მოგახსენოთ, რომ თბილისის სააპელაციო სასამართლოში წარვადგენთ ახალ მტკიცებულებას, რომელიც ექსპერტიზის დასკვნას შეეხება, სადაც პასუხები იქნება გაცემული იმ უმნიშვნელოვანეს კითხვებზე, რომელიც საზოგადოებას აინტერესებს. აქ იქნება საუბარი დანების, სხვადასხვა საგნების, ჭრილობების რაოდენობაზე, ლოკალიზაციაზე და ა.შ. აღნიშნული მტკიცებულება იქნება გადამწყვეტი მოცემულ საქმეზე ჭეშმარიტების დასადგენად.
აღნიშნული ექსპერტიზის დასკვნა უახლოეს დღეებში გვექნება. როგორც კი ამ დასკვნას მივიღებთ, მაშინვე წარვადგენთ თბილისის სააპელაციო სასამართლოში.
ასევე, დავაყენებთ შუამდგომლობას დაკითხული იქნენ ის ექსპერტები, რომლებმაც ჩაატარეს ექსპერტიზა. ისინი მათ მიერ ჩატარებულ ექსპერტიზას დაადასტურებენ და უპასუხებენ ყველა იმ შეკითხვას, რომელიც დაცვის, ბრალდების მხარეს და სასამართლოს ექნება", - აცხადებს კაკაბაძე.
