საქართველოს კანონმდებლობით გათვალისწინებული დეფიციტი (რომელიც ეყრდნობა GFSM 2001 კლასიფიკაციას) 2019 წელს ნაერთი ბიუჯეტისათვის შეადგენს მშპ-თან მიმართებაში 1.8%-ს,  საერთაშორისო სავალუტო ფონდთან არსებული პროგრამის ფარლებში ფისკალური ჩარჩოს ინდიკატორად გამოიყენება მოდიფიცირებული დეფიციტი, რომელიც GFSM 2001 კლასიფიკაციისგან განსხვავებით ფინანსური აქტივებით განხორციელებულ ოპერაციებსაც განიხილავს, როგორც დეფიციტის ფორმირების წყაროს. აღნიშნული მეთოდოლოგიის თანახმად, 2019 წლის დეფიციტი განისაზღვრება მშპ-თან მიმართებაში 2.6%-ის ფარგლებში ხოლო 2020 წლიდან შემცირდება 2.5%-მდე. ამასთან, აღსანიშნავია რომ დამატებით მიმდინარეობს მუშაობა საბიუჯეტო კლასიფიკაციის დახვეწასა და GFSM 2014 მეთოდოლოგიის შესაბამისად ჩამოყალიბებაზე, რომელიც უნდა დასრულდეს მიმდინარე წლის ბოლომდე და ახალ კლასიფიკაციაში უფრო მკაფიოდ იქნება გაწერილი რა შემთხვევაში იქნება შესაძლებელი სახაზინო ოპერაციების ასახვა ფინასნური აქტივების ზრდის მუხლში.

2019 წლის ბიუჯეტის პროექტით პირველად მოხდა საქართველოს სახელმწიფოს ერთიანი ბიუჯეტის პარამეტრების განსაზღვრა, რაც ნაერთ ბიუჯეტთან ერთად ასევე ითვალისწინებს სახელმწიფო ორგანოების მიერ დაფუძნებული სსიპ-ების და ა(ა)იპ-ების კანონმდებლობით ნებადართული შემოსავლებიდან განხორციელებული ოპერაციების შედეგებს. საქართველოს სახელმწიფოს ერთიანი ბიუჯეტის უარყოფით მთლიანი სალდო პროგნოზირებულია 942,0 მლნ ლარით, რაც მშპ-ის 2.1%-ია. IMF-თან არსებული პროგრამის ფარგლებში გათვალისწინებული მეთოდოლოგიის მიხედვით აღნიშნული დეფიციტი შეადგენს მშპ-ის 2.8%-ს.