სასამართლომ დასაშვებად სცნო ყველა ის მტკიცებულება, რომელიც ბრალდების მხარემ წარმოადგინა და საქმე, არსებითი განხილვის მიზნით, მცხეთის რაიონულ სასამართლოს გადასცა, – ამის შესახებ არჩილ ტატუნაშვილის საქმის პროკურორმა, დავით ყაზარაშვილმა პროცესის დასრულების შემდეგ განაცხადა.
ბრალდებულების ადვოკატმა რიგი მტკიცებულებების დაუშვებლად ცნობა მოითხოვა.
"სასამართლომ განმარტა და არ დააკმაყოფილა დაცვის მხარის მოთხოვნა. ბრალდების მხარე მიიჩნევს, რომ ჩვენ მიერ სასამართლოში წარმოდგენილი მტკიცებულებები გამოკვლევის შედეგად დაადასტურებენ, რომ 2018 წლის 22 თებერვალს სწორედ ბრალდებულის მიერ მოხდა არჩილ ტატუნაშვილისა და მასთან ერთად მყოფი ოთხი პირის თავისუფლების უკანონოდ აღკვეთა, ასევე წამების მიზნით, არჩილ ტატუნაშვილის გადაცემა ცხინვალის ე.წ.სამართალდამცველი ორგანოებისთვის“, – განაცხადა ყაზარაშვილმა.
ტატუნაშვილის წამებით მკვლელობაში ბრალდებულ დავით გურწიევისა და ალიკ ტაბოევის მიმართ ბრალდების მუხლი გადაკვალიფიცირდა და პროკურატურა მათ 144-ე პრიმა მუხლის მესამე ნაწილით ედავება, რაც ადამიანის წამებით სიკვდილს გულისხმობს. მათ ბრალი დაუსწრებლად აქვთ წარდგენილი.
ბრალდებულები წითელი ცირკულარით იძებნებიან.
