აზიის განვითარების ბანკმა (აგბ) საქართველოს 2018 წლის ზრდის პროგნოზი მიმდინარე წლის აპრილთან შედარებით 4.5%-დან 4.9%-მდე გაზარდა, რაც ტურიზმის სფეროში მნიშვნელოვანმა ზრდამ და ბიზნესისა და ინვესტორების ნდობის გაზრდის ხარჯზე ინვესტიციების დიდმა ნაკადმა განაპირობა. აგბ-ს მთავარი ყოველწლიური ეკონომიკური გამოცემა Asian Development Outlook (ADO) 2018 საქართველოს 2019 წლის ზრდის მაჩვენებელს 5.0%-ით განსაზღვრავს.
“გასული ათი წლის განმავლობაში საქართველომ შთამბეჭდავ ეკონომიკურ ზრდას მიაღწია,“ - განაცხადა აგბ-ის მუდმივი წარმომადგენლობის დირექტორმა საქართველოში იეშიმ ელჰან-კაიალარმა. – „ველოდებით ძლიერი ეკონომიკური მაჩვენებლის შენარჩუნებას, რადგან სახეზე გვაქვს შიდა და გარე ბაზარზე მოთხოვნის გაძლიერების ტენდენცია.“
აგბ-ს პროგნოზი 2017 წელს მთლიანი შიდა პროდუქტის (მშპ) 5.0%-იან ზრდის შესახებ გამართლდა, ხოლო 2018 წლის პირველ ნახევარში 5.7%-ით გაიზარდა. ახალი საშეღავათო დაბეგვრის რეჟიმით რაც დაბალ გადასახადებს, მეტ მოქნილობასა და დამატებითი ღირებულების გადასახადის მეტობით გადახდის შემთხვევაში ავტომატურ ანაზღაურებას, ასევე გაუქმებული კომპანიებისთვის საგადასახადო ვალდებულებების ჩამოწერას გულისხმობს, განსაკუთრებით მცირე კომპანიებმა ისარგებლეს. მაღალმა კაპიტალ-დაბანდებებმა მოთხოვნისა და სამომხმარებლო ბაზრის ზრდა განაპირობა, რაც 2018 წლის პირველ ნახევარში ფულადი გადარიცხვების 18.3%-იანი მატებით იყო გამოწვეული.
ინფლაცია 2017 წლის ივლისის 6.0% მაჩვენებლიდან 2018 წლის ივლისში 2.8%-მდე შემცირდა, რაც ასევე წლის საშუალო წლიურ მაჩვენებლად დაფიქსირდა. ძირითადი ინფლაცია 2.0%-ზე ქვემოთ დაფიქსირდა. შემცირება აისახა საკვების, თამბაქოს და ალკოჰოლური ნაწარმის, ტანსაცმლის, ფეხსაცმლისა და კავშირგაბმულობის მომსახურების ფასებზე. საკრედიტო ზრდა 2018 წლის პირველ ნახევარში 4.2%-ზე შეჩერდა, რის გამოც საქართველოს ეროვნულმა ბანკმა ივლისში რეფინანსირების განაკვეთი 7.0%-მდე შეამცირა.
აგბ-ს წლიური ანგარიში 2018 წლის ინფლაციის პროგნოზს 3.0%-მდე ამცირებს, ხოლო 2019 წლის პროგნოზს უცვლელად ტოვებს.
მიმდინარე ანგარიშის დეფიციტის ზრდამ 2018 წლის პირველ კვარტალში 11.6%-ს მიაღწია, რადგან ექსპორტის ჯამურმა ზრდამ იმპორტის ჯამურ ზრდას გადააჭარბა. საქონლისა და მომსახურების ექსპორტი პირველ კვარტალში 23.4%-ით გაიზარდა, რისი მიზეზიც საგარეო მოთხოვნის ზრდა და საექსპორტო სექტორში მთავრობის ხელშეწყობა გახდა. კვარტლის პირველ ნახევარში საქონლის ექსპორტი 28.5%-ით გაიზარდა. ამავდროულად, აღმავალმა შიდა მოთხოვნამ, აქტიურმა ეკონომიკურმა ზრდამ და ბიზნესისა და მომსახურების სფეროს მიმართ გამყარებულმა ნდობამ პირველ ნახევარში იმპორტი 22.9%-ით გაზარდა, მეტწილად სამომხმარებლო და ინვესტიციებთან დაკავშირებული პროდუქციის ხარჯზე. მოსალოდნელზე მაღალი ნავთობის ფასების და სახელწიფოს მხრიდან გაზრდილი ინვესტიციების გათვალიწინებით, მიმდინარე ანგარიშის დეფიციტზე საპროგნოზო მაჩვენებლები კვლავ ძალაში რჩება.
აზიის განვითარების ბანკი საქართველოს მხარდაჭერას 2007 წლიდან უწევს და ის ქვეყნის განვითარების ხელშეწყობის ყველაზე დიდი მრავალმხრივი პარტნიორია. საქართველოსთვის გაცემული სუვერენული და არასუვერენული სესხების ჯამური რაოდენობა 2.42 მილიარდ აშშ დოლარს შეადგენს.
აგბ-ს მიზანია, ხელი შეუწყოს აზიისა და წყნარი ოკეანის რეგიონის წარმატებულ, მრავალმხრივ, მედეგ და მდგრად განვითარებას. ამავდროულად, ის კვლავაც აგრძელებს მუშაობას რეგიონში უკიდურესი სიღარიბის აღმოსაფხვრელად. 1966 წელს დაარსებული ორგანიზაცია აერთიანებს 67 ქვეყანას, მათ შორის 48 აზიის რეგიონიდანაა წარმოდგენილი. 2017 წელს აგბ-ს მიერ განხორციელებული პროექტების ჯამურმა ღირებულებამ 32.2 მილიარდი აშშ დოლარი შეადგინა, მათ შორის 11.9 მილიარდი თანადაფინანსების სახით.
