გაეროს გენერალური ასამბლეის 73-ე სესიის გენერალური დებატების ფარგლებში დავით ზალკალიანი მაღალი დონის ღონისძიებას დაესწრო, რომელიც მსოფლიოში ადამიანის უფლებათა დაცვის საკითხებს ეძღვნება (Good Human Rights stories). ამ ღონისძიების მიზანი ადამიანის უფლებათა დაცვის სფეროში ყველაზე სამაგალითო და წარმატებული ისტორიების გაზიარებაა.
დავით ზალკალიანმა თავის გამოსვლაში საქართველოს, როგორც რეფორმისტული ქვეყნის მიერ გაწეულ ძალისხმევაზე ისაუბრა. მისი თქმით, 2012 წელს საქართველოს მთავრობამ მემკვიდრეობად უაღრესად პოლიტიზირებული და რეპრესიული პენიტენციური სისტემა მიიღო, სწორედ ამიტომ, განსაკუთრებულად შთამბეჭდავი სწორედ პენიტენციურ სისტემაში გატარებული რეფორმებია, რომლებიც სხვა ქვეყნებისთვის შეიძლება მისაბაძ მაგალითად იქცეს.
ზალკალიანის თქმით, პენიტენციურ სისტემაში გატარებული რეფორმების ამოსავალს ადამიანის უფლებათა დაცვის სტანდარტების ამაღლება წარმოადგენდა. მან ხაზგასმით აღნიშნა, რომ წამება, დამამცირებელი და არაადამიანური მოპყრობა აღარ გამოიყენება სასჯელაღსრულების დაწესებულებების მართვის მეთოდად, რაც გატარებული რეფორმების მთავარი მონაპოვარია. „ამასთან, საქართველოს მთავრობის მიერ გაწეული ძალისხმევის შედეგად, და ადამიანის უფლებათა მონიტორინგის ორგანიზაციათა რეკომენდაციების შესრულების გზით, საქართველო მნიშვნელოვნად მიუახლოვდა ერვოკავშირის სტანდარტებს" - დასძინა საგარეო საქმეთა მინისტრმა.
მთელი რიგი საკანონმდებლო ცვლილებების შედეგად, საქართველომ დაძლია პატიმრებით გადაჭედილი ციხეების პრობლემა და გაუმჯობესება პირობით ვადამდე გათავისუფლების მექანიზმი. ამ პროცესის წარმატებას მოწმობს ის, რომ ციხეებში პატიმართა რაოდენობა 24 000 დან 9 900 -მდე შემცირდა.
ზალკალიანის თქმით, რეფორმების გზაზე მთავარ სიახლეს წარმოადგენს სასჯელის მოხდის ინდივიდუალური დაგეგმვა და რისკის შეფასების მექანიზმების ამოქმედება, რაც საზოგადოებრივი უსაფრთხოებას უზრუნველყოფასთან ერთად, პატიმრებს გათავისუფლებისთვის მომზადების პროცესშიც ეხმარება. პატიმრებს იმედი გაუჩნდათ, რომ ისინი საზოგადოებაში ინტეგრაციას კვლავ შეძლებენ. პენიტენციური სისტემის მთავარ მიზანს სწორედ პატიმართა რესოციალიზაციის უზრუნველყოფა და განმეორებითი დანაშაულის რისკის შემცირება წარმოადგენს.
„ადამიანის უფლებათა საყოველთაო დეკლარაციის 70-ე წლისთავი შეგვახსენებს, რომ ჩვენი საერთო ვალდებულება ადამიანის უფლებათა საყოველთაო დაცვის უზრუნველყოფაა. სწორედ ამ სულისკვეთებით გიზიარებთ საქართველოს პენიტენციურ სისტემაში გატარებული რეფორმების პოზიტიურ გამოცდილებას და მზად ვართ ვიმსჯელოთ ჩვენს წინაშე არსებული გამოწვევების დასაძლევად", - განაცხადა დავით ზალკალიანმა.
ინიციატივა „Good Human Rights Stories" 2018 წელს, „ადამიანის უფლებათა საყოველთაო დეკლარაციის" მიღებიდან 70 წლის იუბილის აღსანიშნავად, ადამიანის უფლებათა დაცვის საკითხებში ევროკავშირის სპეციალურმა წარმომადგენელმა, სტავროს ლამბრინიდისმა წარმოადგინა. იგი მიზნად ისახავს ხელი შეუწყოს მსოფლიოში ადამიანის უფლებათა დაცვის მიმართულებით ახალი პოზიტიური ნარატივის გავრცელებას და ადამიანის უფლებათა დაცვის სფეროში სამაგალითო და წარმატებული ისტორიების გაზიარებას. საქართველოსთან ერთად, რეგიონთაშორისი ჯგუფის წევრებად მოწვეულნი არიან ნორვეგია, არგენტინა, ახალი ზელანდია, ურუგვაი, ჩილე, ინდონეზია, კორეა და სხვა.
ინიციატივისა და ჯგუფის ოფიციალური წარდგენა გაერო-ს გენერალური ასამბლეის 73-ე სესიის გენერალური დებატების ფარგლებში გამართულ მაღალი დონის ღონისძიებაზე განხორციელდა.
