12-15 სექტემბერს, სასტუმრო ბილტმორ თბილისში, საქართველოში პირველი საერთაშორისო M&A ფორუმი, Globalscope 2018 გაიმართება. ფორუმის მასპინძელია საინვესტიციო კომპანია ალიანს ჯგუფი კაპიტალი.
ეს უკანასკნელი, ამიერკავკასიის რეგიონში პირველია, რომელიც მსოფლიოში ერთ-ერთი უმსხვილესი, შერწყმასა და შესყიდვაზე სპეციალიზებული, მსოფლიო ქსელის - Globalscope -ის წევრი გახდა.
Globalscope 1987 წელს დაარსებული, მსოფლიოს წამყვანი Mergers & Acqisitions ქსელია, რომელიც მნიშვნელოვან როლს ასრულებს M&A სფეროში, მართავს ბიზნესის შესყიდვების, გაფართოების და რესტრუქტურიზების ტრანზაქციებს მსოფლიოს ყველა ქვეყანაში.
საინვესტიციო კომპანია ალიანს ჯგუფ კაპიტალმა Globalscope-ის მორიგი ფორუმისთვის საქართველოში მასპინძლობის უფლება ავსტრალიაში გამართულ წინა წლის ფორუმზე, 46 წევრი ქვეყნის კენჭისყრის შედეგად მოიპოვა რის შედეგადაც 12-15 სექტემბერს თბილისში გამართულ ფორუმს, მსოფლიოს 55 უმსხვილესი საინვესტიციო კომპანია 40-ზე მეტი ქვეყნიდან დაესწრება.
M&A ფორუმში მონაწილე საერთაშორისო საინვესტიციო კომპანიები საქართველოს საინვესტიციო შესაძლებლობებს, ბიზნესის განვითარების პერსპექტივებსა და კონკრეტულ საინვესტიციო პროექტებს გაეცნობიან და განიხილავენ.
პირველად, საქართველოში ქართული კომპანიები, რომლებიც დაინტერესებული არიან ახალი ბიზნესის შეძენით საზღვარგარეთ, არსებული ბიზნესის გაფართოებით ადგილზე ან ქვეყნის ფარგლებს გარეთ, კონფიდენციალურობის სრული დაცვით შეძლებენ ბიზნესის შერწყმას ან გაყიდვას.
