მომავალ კვირაში ახალი საბაჟო კოდექსის პროექტის პრეზენტაცია გაიმართება. როგორც ქვეყნის პრემიერ-მინისტრი მამუკა ბახტაძე განმარტავს, მოქმედი კოდექსი ქვეყნის წინაშე არსებულ გამოწვევებს, ვერ პასუხობს
როგორც მამუკა ბახტაძემ განმარტა, საბაჟო კოდექსის პროექტზე მუშაობა ევროკავშირის ექსპერტებთან ერთად მიმდინარეობდა.
„პარლამენტში გამოსვლისას დავპირდი საზოგადოებას, რომ საქართველოში გვექნება ევროპული სტანდარტების საბაჟო კოდექსი. იცით ჩემი დამოკიდებულება ამ საკითხის მიმართ, რომ არსებული საბაჟო კოდექსი ვერ პასუხობს გამოწვევებს, რაც დღეს ჩვენ გაქვს ჩვენი ქვეყნის წინაშე. მომავალ კვირას მოხდება პირველი პროექტის პრეზენტაცია“, – განაცხადა პრემიერ-მინისტრმა.
პრემიერ-მინისტრი დარწმუნებულია, რომ ახალი კოდექსი გახდება სტიმული ევროკავშირიდან ინვესტიციების მოსაზიდად და ხელს შეუწყობს ქართული ბიზნესის ინტეგრაციას ევროპულ ბაზარზე.
„დამკვიდრდება მარტივი და სამართლიანი თამაშის წესები, შეიქმნება სტაბილური ბიზნეს გარემო, დაინერგება კიდევ უფრო მეტად გამარტივებული საბაჟო პროცედურები, კერძო სექტორისთვის შემცირდება დანახარჯები, რომელიც დაკავშირებულია საგარეო ვაჭრობასთან“, – განაცხადა პრემიერ-მინისტრმა.
