6 სექტემბერს, 19:00 საათზე, "შოთა რუსთაველის სახელობის სახელმწიფო დრამატული თეატრი", საქართველო-ისრაელის ბიზნესპალატისა და ებრაული სააგენტო "ისრაელისთვის" ორგანიზატორობით, ისრაელის კვირეულის დასკვნით საღამოს უმასპინძლებს. ღონისძიება საქართველოში ისრაელისა და მსოფლიო ებრაელობის ოფიციალური აქტივობის 20 წლის იუბილესადმია მიძღვნილი.
გალაკონცერტზე ცნობილი მომღერლები - ია ჩანტლაძე, სოფო ნიჟარაძე, სოფო ხალვაში, ისრაელიდან მიშელი, ლიორა - ცნობილ ებრაულ სიმღერებს შეასრულებენ. საღამოს დაესწრება საქართველოს მთავრობის წარმომადგენლობა და ისრაელის სამთავრობო დელეგაცია მინისტრის, სოფა ლანდვერის ხელმძღვანელობით.
კვირეულის ფარგლებში დაგეგმილია სხვა ღონისძიებებიც: 1. ყაზბეგის მარათონი (მსვლელობა გუდაურიდან-ყაზბეგამდე). წელს მონაწილეობას ისრაელელები მიიღებენ, ხოლო შემდეგი წლიდან მარათონი საერთაშორისო და მასშტაბურ ხასიათს მიიღებს; 2. თემატური გამოფენა (ეროვნული მუზეუმი); 3. ისრაელის სამთავრობო დელეგაციის შეხვედრა მთავრობის წარმომადგენლებთან; 4. ებრაული დელეგაციის შეხვედრა ბიზნესის, კულტურის, შოუბიზნესის წარმომადგენლებთნ; 5. ბიზნეს და კულტურული აქციები; 6. სპეციალურად ისრაელის კვირეულისათვის გამოიცემა ჟურნალი, სადაც დაიბეჭდება სტატიები საქართველოს ეკონომიკაზე, ტურიზმის ინდუსტრიასა და საქართველოში მიმდინარე პოზიტიურ ცვლილებებზე.
ისრაელის კვირეული 2 სექტემბერს გაიხსნება და 9 სექტემბერს დაიხურება.
ყოფილი საბჭოთა კავშირის დროს ებრაული სააგენტოს პირველი წარმომადგენელი საქართველოში და ახლა უკვე თავად ორი ქვეყნის დამაკავშირებელი, საქართველო-ისრაელის ბიზნესპალატის პრეზიდენტი, იციკ მოშე აცხადებს, რომ თბილისი იყო პირველი ქალაქი, რომელმაც ფართოდ გაუღო კარი მსოფლიო ებრაელობას და საერთაშორისო მისიებს.
მთავრობის მიერ გატარებულმა ლიბერალურმა ეკონომიკურმა რეფორმებმა, შემცირებულმა გადასახადებმა და მიმზიდველმა საინვესტიციო გარემომ განაპირობა მსოფლიო ებრაელობის დაინტერესების ზრდა საქართველოსადმი. საქართველოსა და ისრაელის მრავალსაუკუნოვან მეგობრულ კავშირს, საქმიანი ურთიერთობების უდიდესი მომავალი აქვს. ჩვენმა ქვეყნებმა კარგად იციან, რას ნიშნავს რთული გეოპოლიტიკური გარემო და ამ გარემოში ისეთი ღირებულებების დამკვიდრება, როგორიცაა მეგობრობა, მოკავშირეობა და პარტნიორობა. ბედნიერი ვარ, რომ ამ ურთიერთობების გაღრმავებაში თავისი წვლილი საქართველო-ისრაელის ბიზნეს პალატამაც შეიტანა. ქართულ-ებრაული მრავალსაუკუნოვანი ისტორიული ურთიერთობა ბოლო დროს შეიცვალა და უფრო მასშტაბური გახდა, რაც უკვე საქართველო-ისრაელის და მსოფლიო ებრაელების ურთიერთობას ნიშნავს. ეს კავშირები არ შემოიფარგლება მხოლოდ მეგობრობით, მას აქვს საქმიანი ხასიათი და ეს საქმიანობა მოიცავს მრავალ სფეროს: ბიზნესი, ტურიზმი, სოფლის მეურნეობა, უძრავი ქონება", _ განაცხადა მან.
