სმიტების ოჯახის სამი წევრის მკვლელობაში ბრალდებულ მალხაზ კობაურის ადვოკატის, ალექსანდრე კობაიძის განცხადებით, ბრალდებულს ფსიქიკურ-ფსიქოლოგიური ექსპერტიზა ამ დრომდე უტარდება. ადვოკატი დარწმუნებულია, რომ ექსპერტიზა ბრალდებულის შერაცხადობას დაადგენს.
"რაც შეეხება ფსიქიკურ-ფსიქოლოგიურ ექსპერტიზას, მასზე ამ დრომდე მიმდინარეობს დაკვირვება. კარგია, რომ მსგავსი ტიპის ექსპერტიზა ტარდება, რადგან ცალსახად დადასტურდება, რომ კობაური არის ჯანმრთელი და გამორიცხულია, რომ ჯანმრთელ ადამიანს ეს დანაშაული მარტოს ჩაედინა. თვითონ ამბობს, რომ შერაცხადი ვარო და ხუმრობს კიდეც - როდესაც ექსპერტიზაზე მიმიყვანეს, მითხრეს, შენ კი არ უნდა მოეყვანე ექსპერტიზაზე, ის უნდა მოეყვანათ, ვინც შენ აქ გამოგიშვაო. თავიდან ის ნამდვილად არ იყო ასეთ განწყობაზე და მუდმივად თავი ჰქონდა დახრილი, მაგრამ საქმეში ჩვენი ჩართვის შემდეგ, უფრო ლაღი გახდა და ცდილობს, გამოკვეთოს ის ფაქტობრივი გარემოებები, რომელსაც რეალურად ჰქონდა ადგილი“, - განაცხადა ადვოკატმა.
მისივე განმარტებით, ბრალდებული მკვლელობასა და ლორა სმიტის გაუპატიურებას კატეგორიულად უარყოფს. ამასთანავე, კობაიძე აცხადებს, რომ ბრალდების მხარის მიერ კობაურის გამოკითხვის შემდეგ, მისი ჩვენება ბრალდებულის თანხმობით, საჯარო გახდება.
