ხვალ, 7 აგვისტოს თბილისში, რიყის პარკში ისრაელური კომპანია „კას გრუფი“ მის მიერ წარმოებული ე. წ. სითი ბოქსების პრეზენტაციას გამართავს. კომპანიამ ცოტა ხნის წინ გაიმარჯვა თბილისის მერიის მიერ გამოცხადებულ ტენდერში, რომლის თანახმად, დედაქალაქში სპეციალური ტუალეტები უნდა განთავსდეს.
პრეზენტაციას მერიის, ტურიზმის ეროვნული ადმინისტრაციისა და საქართველო-ისრაელის ბიზნეს-პალატის ხელმძღვანელობა დაესწრება. პრეზენტაციას გააშუქებს ისრაელის წამყვანი ტელეკომპანიის „მეორე არხის“ გადამღები ჯგუფი, რომელიც საქართველოს ეკონომიკურ პოტენციალზე სპეციალურ სიუჟეტს ამზადებს.
სითი ბოქსები თანამედროვე ტექნოლოგიებით შექმნილი ტუალეტებია, რომელიც თბილისში 40 სხვადასხვა ადგილას დაიდგმება. მას „კას გრუფი“ ჩინეთში, საკუთარ ქარხანაში აწარმოებს.
„კას გრუფი“ საქართველოში რამდენიმე წელია, საქართველო-ისრაელის ბიზნეს პალატის ეგიდით შემოვიდა და სასტუმროებისა და თანამედროვე ტექნოლოგიების სამრეცხაოს მფლობელია. ის ქვეყანაში 30 მლნ დოლარის ინვესტიციის განხორციელებას აპირებს.
საქართველო-ისრაელის ბიზნეს პალატის ხელმძღვანელის, იციკ მოშეს თქმით, აღმოსავლეთ ევროპაში საქართველო ისრაელური ინვესტიციებისთვის ყველაზე ხელსაყრელი ადგილია და 2020 წლისთვის ისრაელიდან და მსოფლიო ებრაელობიდან შემოსული თანხების რაოდენობა 1 მლრდ დოლარს მიაღწევს. რაც შეეხება საქართველოში „კას გრუფის“ საქმიანობას, კომპანია თანამედროვე სასტუმროებითა და მაღალტექნოლოგიური სამრეცხაოთი, აგრეთვე, ქალაქში ინოვაციური პროდუქტების დანერგვით ხელს უწყობს ტურიზმის ინფრასტრუქტურის განვითარებას, რაც ესოდენ მნიშვნელოვანია ამ სფეროში დიდი პოტენციალის მქონე ქვეყნისთვის.
