დღეისათვის საქართველოს სამოქალაქო საჰაერო ხომალდების სახელმწიფო რეესტრში ექსპლუატანტების (ავიაკომპანიების) ბალანსზე 52 ერთეული საჰაერო ხომალდია, კერძო მფლობელებაში კი – 16 ერთეული საჰაერო ხომალდი.

საქართველოს რეესტრში მყოფი სატვირთო თვითმფრინავები

“Sky Travel”-ის აეროსტატი (4L-BAH)

ავიაკომპანიების ექსპლუატაციაში Boeing-ის, Airbus-ის, Bombardier-ის, Embraer-ის, Cessna-ს, Eurocopter-ის (Airbus Helicopters), MIL-ის, Aeroprakt-ის, Antonov-ის, Sud Aviation-ის, Bell Helicopter-ის, Agusta-ს, PZL Warszawa-Okęcie-ს, Let Kunovice-ს, Kubicek Balloons-ის და Cameron Balloons-ის წარმოების სხვადასხვა კლასის, ტიპის, მოდიფიკაციის და ასაფრენი მასის საჰაერო ხომალდებია.

“ავიატორი +”-ის BELL-505 (4L-ADJ)

საქართველოს სამოქალაქო საჰაერო ხომალდების სახელმწიფო რეესტრში ქარხნის გამოშვების წლის მიხედვით ყველაზე ახალი BELL-505 ტიპის ვერტმფრენია. „ავიატორი +“-ის ექსპლუატაციაში მყოფი საჰაერო ხომალდი მიმდინარე წელს არის გამოშვებული და სამოქალაქო ავიაციის სააგენტოს მიერ 2018 წლის 15 ივნისს არის დარეგისტრირებული (სარეგისტრაციო ნომერი 4L-ADJ). ამერიკულ-კანადური წარმოების მსუბუქი ვერტმფრენი ხუთ ადგილიანია (ერთი პილოტი, ოთხი მგზავრი) და აღჭურვილია თანამედროვე აეროდინამიკური კომპონენტებით. 2016 წელს არის გამოშვებულია „საქაერონავიგაციის“ კუთვნილი ვერტმფრენი AS350 B3 (სარეგისტრაციო ნომერი 4L-NAV). „Airbus Helicopters“-ის წარმოებული „ევროკოპტერი“ 6 ადგილიანია (ერთი პილოტი, ხუთი მგზავრი) და მრავალგვარი გამოყენებისაა.

საავიაციო უნივერსიტეტის ზემსუბუქი A-22LS (4L-ULS)

2014 წელს არის გამოშვებული საავიაციო უნივერსიტეტის ექსპლუატაციაში მყოფი ორ ადგილიანი ზემსუბუქი თვითმფრინავი A-22LS (სარეგისტრაციო ნომერი 4L-ULS), რომელიც სპორტული და სასწავლო დანიშნულებით გამოიყენება.

“Georgian Airways”-ის B 737-7CT (4L-TGO)

რეესტრში რიცხულ სამგზავრო თვითმფრინავებს შორის, ყველაზე ახალი ავიაკომპანია „Georgian Airways“-ის ექსპლუატაციაში მყოფი B 737-7CT-ია. 2008 წელს გამოშვებული საშუალო ფიუზელაჟის საჰაერო ხომალდი მოკლე და საშუალო დისტანციაზე ოპერირებს. თვითმფრინავი სააგენტომ 2017 წელს დაარეგისტრირა (სარეგისტრაციო ნომერი 4L-TGO).

“Georgian Airways”-ის Embraer ERJ 190-100 (4L-TGU)

“Myway Airlines”-ის B 737-8AL​

გამოშვების წლის მიხედვით შემდეგ მოდიან ამავე ავიაკომპანიის სამი ერთეული Embraer ERJ 190-100 ტიპის (2007წ) და ავიაკომპანია “Myway Airlines”-ის ორი ერთეული Boeing B 737-8AL ტიპის საჰაერო ხომალდები (2007წ).

“სერვისეარის” Cessna 182J (4L-USA)​

საქართველოს სამოქალაქო საჰაერო ხომალდების სახელმწიფო რეესტრში მყოფ საჰაერო ხომალდებს შორის ყველაზე “ასაკოვანი”, 1966 წელს გამოშვებული Cessna 182J-ია, რომელსაც ექსპლუატაციას „სერვისეარი“ უწევს და რეესტრში 2004 წელს დარეგისტრირდა (სარეგისტრაციო ნომერი 4L-USA). ამერიკული წარმოების მსუბუქი საჰაერო ხომალდი ოთხ ადგილიანია (ერთი პილოტი, სამი მგზავრი) და ფრენებს ბიზნეს შეკვეთის შემთხვევაში ახორციელებს.

ინფორმაციისთვის:

საქართველოს სამოქალაქო საჰაერო ხომალდების სახელმწიფო რეესტრში რეგისტრირებული საჰაერო ხომალდების საფრენად ვარგისობაზე და ექსპლუატაციაზე ზედამხედველობა ხორციელდება ეკონომიკის სამინისტროს სამოქალაქო ავიაციის სააგენტოს მიერ. რეესტრში რიცხულ ყველა საჰაერო ხომალდს გააჩნია ფრენის ვარგისობის მოქმედი სერტიფიკატი და თითოეულ მათგანს უტარდება როგორც ოპერატიული და პერიოდული ტექნიკური მომსახურება (სხ-ის და/ან მისი კომპონენტების საფრენად ვარგისობის შენარჩუნების უზრუნველსაყოფად ცალ-ცალკე ან ერთობლივად ისეთი სამუშაოების ჩატარება,რომელიც მოიცავსაღმდგენ, შემოწმებით, გაუმართაობების აღმოფხვრის სამუშაოებს, ასევე მოდიფიცირებას და/ან რემონტის პრაქტიკულ განხორციელებას), ისე გეგმიური, არაგეგმიური და გაფრენისწინა შემოწმებები.