იცით, რომ მთელი რიგი საგამოძიებო მოქმედებები არ ჩატარებულა სუბელიანის და მისი დეიდაშვილის მიმართ. თვლით თუ არა რომ დასაწყებია გამოძიება, რომელმაც უნდა შეისწავლოს, ხომ არ აფარებდა მირზა სუბელიანი ხელს და მის სამსახუროებრივ მდგომარეობას ხომ არ იყენებდა იმისთვის, რომ გამოძიებისთვის ხელი შეეშალა?, - ამ შეკითხვით პარლამენტის დროებითი საგამოძიებო კომისიის წევრმა, ოთარ კახიძემ შინაგან საქმეთა მინისტრს, გიორგი გახარიას მიმართა.
აღნიშნულ კითხვაზე შს მინისტრმა საკმაოდ ვრცლად უპასუხა და განმარტა, რომ სუბელიანი და მისი ნათესავები გამოძიებასთან თავიდანვე თანამშრომლობდნენ.
„ძალიან თეორიული შეკითხვაა. ასევე თეორიულ პასუხს გაგცემთ. პირველ რიგში, იმისთვის, რომ თქვენს თეორიულ შეკითხვას გავცეთ პასუხი, პირველ რიგში, უნდა დავადგინოთ მიზეზ-შედეგობრივი კავშირი საბოლოო შედეგსა და მირზა სუბელიანის აქტივობებს შორის.
რეალურად მირზა სუბელიანი, რომელიც მაშინ არც ვიცოდი საერთოდ ვინ იყო და რას წარმოადგენდა, ამ საქმესთან ვინც აკავშირებს, შვილი და მისი ნათესავები, არიან მცირე ერთეულები იმ ადამიანებიდან, რომლებიც თანამშრომლობდნენ და თანამშრომლობენ გამოძიებასთან. ამაში ხომ მეთანხმებით?
დაველოდებით კომისიის დასრულებას, რომლის ძირითადი მიზანიც არის გამოვავლინოთ პროცედურული დარღვევები, ან გადამეტება. ამის შემდეგ ვიმსჯელებთ თქვენთან ერთად ამ საქმეზე“, - განაცხადა გახარიამ.
