თბილისი საქალაქო სასამართლოში დღეს, 11:00 საათზე, ბარნოვის ქუჩაზე 25 წლის თამარ გამრეკელაშვილის მკვლელობაში ბრალდებულ ვეფხია ბაქრაძის პროცესი გაიმართება.
შეგახსნებთ, რომ მამაინაცვალს, რომელსაც სახელმწიფო ბრალდება მცირეწლოვანი შვილების თვალწინ გამრეკელაშვილის მკვლელობას ედავება, რამდენიმე დღის წინ, ბრალი დაუმძიმა. ბაქრაძეს დამამძიმებელ გარემოებებში განზრახ მკვლელობის გარდა, ბრალი კიდევ შვიდ ეპიზოდთან დაკავშირებით დაუმძიმდა, მათ შორის გაუპატიურების მუხლით.
ვეფხია ბაქრაძეს გამრეკელაშვილის მკვლელობის ეპიზოდთან დაკავშირებით მხოლოდ ორი ბრალდება აქვს წაყენებული. სისხლის სამართლის კოდექსის 6 სხვადასხვა მუხლით კი გამოძიებამ მას ბრალი მოკლულის დედის, ნათელა გობაძის მიმართ ჩადენილი დანაშაულების გამო წაუყენა. ამასთან, ბრალდების ყველა ეპიზოდს ოჯახური დანაშაულის კვალიფიკაცია მიენიჭა.
რაც შეეხება ბრალდებებს, ვეფხია ბაქრაძეს ჯამში 25 წლის თამარ გამრეკელაშვილის დამამძიმებელ გარემოებებში განზრახ მკვლელობას, სხვისი ნივთის დაზიანებას ან განადგურებას, თავისუფლების უკანონო აღკვეთას, დამამცირებელ ან არაადამიანურ მოპყრობას, ძალადობას, მუქარას, გაუპატიურებასა და ქორწინების იძულებას ედავება.
ბაქრაძე მხოლოდ მკვლელობას აღიარებს, დანარჩენ ეპიზოდებში კი, თავს დამნაშავედ არ სცნობს.
