ზუგდიდის რაიონულმა სასამართლომ ფოთში მომხდართან დაკავშირებით დაკავებულ პოლიციელს, ჭაბუკა ლემონჯავას აღკვეთის ღონისძიების სახით პატიმრობა შეუფარდა.
მოსამართლე ნატრული აკობიამ ბრალდებულის მიმართ აღკვეთი ღონისძიების გამოყენების თაობაზე პროკურატურის შუამდგომლობა სრულად დააკმაყოფილა.
დაცვის მხარემ სასამართლოს გირაოს სახით უძრავი ქონებით უზრუნველყოფილი 20 ათასი ლარი შესთავაზა, თუმცა, მოსამართლემ ადვოკატის შუამდგომლობა არ გაითვალისწინა.
შეგახსენებთ, შინაგან საქმეთა სამინისტროს ინფორმაციით, ფოთში ჩასარიცხი აპარატის გაქურდვის მცდელობისას დაუდგენელი პირი სამართალდამცველს თავს დაესხა და ბლაგვი საგნით თავის არეში ჭრილობა მიაყენა. როგორც უწყების მიერ გავრცელებულ განცხადებაშია აღნიშნული, სამართალდამცველმა სამსახურებრივი იარაღიდან მოახდინა გასროლა, რის შედეგადაც დასაკავებელი პირი დაჭრა. დაჭრილი საავადმყოფოში მიყვანის შემდეგ გარდაიცვალა.
სამართალდამცველს ბრალი სისხლის სამართლის კოდექსის 116-ე მუხლით ედება, რაც სიცოცხლის გაუფრთხილებლობით მოსპობას გულისხმობს.
