ჩვენთვის ყველა პაციენტი არის პაციენტი, პირველ რიგში მათ ვუწევთ სამედიცინო მომსახურებას და შემიძლია თამამად განვაცხადო, რომ ჩვენთან ჰომოფობიას ადგილი არასდროს არ აქვს, არავითარ შემთხვევაში ასეთი რაღაც არ მომხდარა და არც არასდროს ხდება, - ამის შესახებ „ჯი-ეიჩ-ენს“ „ნიუ ჰოსპიტალსის“ საზოგადოებასთან ურთიერთობისა და მარკეტინგის მენეჯერმა ანა გოგიჩაძემ განუცხადა.
ანა გოგიჩაძის თქმით, იმ ღამით, როდესაც „ნიუ ჰოსპიტალსში“ დაშავებული ტრანსგენდერი ქალი შეიყვანეს, მას თან ახლდა მისი მეგობარი, რომელიც ფოტო და ვიდეო გადაღებას ახორციელებდა. მისი თქმით, ექიმმა შენიშვნა მისცა დაშავებული ტრანსგენდერი ქალის მეგობარს, რადგან, მისივე თქმით, „ნიუ ჰოსპიტალსში“ ფოტო და ვიდეო გადაღება აკრძალულია.
"ეს პაციენტი თავის თანმხლებ პირთან ერთად სასწრაფომ შემოიყვანა „ნიუ ჰოსპიტალსში“, მოთავსდა პაციენტი მიმღებ განყოფილებაში, მას ახლდა მისი მეგობარი თანმხლები პირი, რომელიც ახორციელებდა ფოტო და ვიდეო გადაღებას. მოგეხსენებათ, მიმღებ განყოფილებაში არ შეიძლება ფოტო და ვიდეო გადაღება, იმიტომ რომ სხვა პაციენტებიც იმყოფებიან იქ და „ნიუ ჰოსპიტალსის“ შინაგანაწესით აკრძალულია. ექიმმა სთხოვა, რომ შეეწყვიტა ეს გადაღება, რასაც მოჰყვა მისი არაადეკვატური რეაქცია, გაბრაზდა ეს პაციენტის თანმხლები პირი და გადმოვიდა შეურაცხყოფაზე, დაიწყო შეურაცხყოფის მიყენება მედპერსონალისთვის, ჰოსპიტალისთვის და მოკლედ, დაარღვია ჰოსპიტალში მოქცევის წესები. შემდეგ მოხდა საპატრულო პოლიციის გამოძახება, მოვიდა პატრული და ჰოსპიტალის ტერიტორია ამ პაციენტმა და მისმა თანხმლებმა პირმა დატოვეს საპატრულო პოლიციის ეკიპაჟთან ერთად", - განაცხადა გოგიჩაძემ.
მისი თქმით, „ნიუ ჰოსპიტალსი“ ერთმნიშვნელოვნად ემიჯნება ჰოფომობიას და კლინიკა ყოველდღიურად ასობით ადამიანს ემსახურება, განურჩევლად მათი სქესისა, რასისა, აღმსარებლობისა და ა.შ.
"ჩვენ ყოველდღიურად სამედიცინო მომსახურებას ვუწევთ და ვემსახურებით ასობით ადამიანს, განურჩევლად მათი სქესისა, რასისა, აღმსარებლობისა და ა.შ. ჩვენი მხრიდან მსგავსი არაფერი არ ყოფილა, არანაირ ჰომოფობიას ადგილი არ ჰქონია და ერთმნიშვნელოვნად ვემიჯენებით ასეთ ქმედებებს. ასეთი რაღაც ჩვენთან არასდროს ხდება", - აღნიშნა მან.
ტრანსგენდერი ქალის მეგობრის კიდევ ერთ ბრალდებასთან დაკავშირებით, რომ მას ექიმები ჰოსპიტალის შესასვლელი კარის ჩამომტვრევას ედავებიან, გოგიჩაძე ამბობს, რომ მსგავსი რამის დაბრალება მათი მხრიდან არ მომხდარა და არც ვიდეოჩანაწერი ამოღებულა.
"არავითარი მსგავსი რაღაც არ ყოფილა, ჩვენ მათთვის არაფერი დაგვიბრალებია. რა ვიდეოჩანაწერები ნახეს, არავის არ ამოუღია ეს ვიდეოჩანაწერები, ჩვენთვის არ მოუმართავს არავის მსგავსი თხოვნით, შესაბამისად, არ მაქვს ინფორმაცია, რა ვიდეოჩანაწერზეა საუბარი, რომელიც ალბათ, არც არსებობს", - გვითხრა მან.
ცნობისთვის, 23 ივლისს, გვიან ღამით თბილისში ტრანსგენდერ ქალს სცემეს. მისი მეგობრის ინფორმაციით, ქალს თავს სამი უცნობი მამაკაცი დაესხა.
როგორც დაშავებულის ერთ-ერთმა მეგობარმა სოციალურ ქსელში დაწერა, ტრანსგენდერი ქალი ამანდა სასწრაფო დახმარების ჯგუფმა “ნიუ ჰოსპიტალსში” გადაიყვანა, სადაც მათ ტრანსფობიური გარემო დახვდათ.
შეგახსენებთ, შინაგან საქმეთა სამინისტროს ინფორმაციით, ტრანსგენდერი ქალის ცემაზე გამოძიება სსკ-ს 126-ე მუხლით მიმდინარეობს, რაც ძალადობას გულისხმობს.
უწყების ინფორმაციით, საქმეზე მიმდინარეობს საგამოძიებო მოქმედებები. გამოკითხვაზეა დაბარებული ორივე მხარე და დანიშნულია ექსპერტიზა.
