24 ივლისს კოალიციამ დამოუკიდებელი და გამჭვირვალე მართლმსაჯულებისათვის, USAID/PROLoG-ისა და საქართველოს ღია საზოგადოების ფონდის მხარდაჭერით გამართა საზოგადოებრივი ფორუმი პროკურატურის რეფორმირებისათვის აუცილებელი საკანონმდებლო ცვლილებების განსახილველად.
კონფერენცია გახსნეს პარლამენტის თავმჯდომარე ირაკლი კობახიძემ, ახლად დანიშნულმა მთავარმა პროკურორმა შალვა თადუმაძემ, USAID-ის დემოკრატიის, მმართველობისა და სოციალური განვითარების ოფისის ხელმძღვანელის მოვალეობის შემსრულებელმა ლორა ბ. ბერგერმა, კოალიცია დამოუკიდებელი და გამჭვირვალე მართლმსაჯულებისათვის თავმჯდომარემ გიორგი მშვენიერაძემ და საქართველოს ღია საზოგადოების ფონდის ადამიანის უფლებების პროგრამის მენეჯერმა გიორგი ჩიტიძემ.
"საქართველოს კონსტიტუციის 2017 წლის ცვლილებებით შეიცვალა პროკურატურის სტატუსი და პროკურატურის მეტი დამოუკიდებლობის უზრუნველსაყოფად გაჩნდა საკონონმდებლო ცვლილებების აუცილებლობა. კოალიციის წარმომადგენლებმა წარმოადგინეს რეკომენდაციები საპროკურორო საბჭოს შემადგენლობის და ფუნქციების რეფორმირების და პარლამენტის წინაშე პროკურატურის ანგარიშვალდებულების უზრუნველყოფის საკითხებზე. შემოთავაზებული ცვლილებების მიზანია უზრუნველყოს პროკურატურის დამოუკიდებლობა, გამჭვირვალობა და ეფექტურობა ახალი საკონსტიტუციო ჩარჩოსა და საერთაშორისო სტანდარტების დაცვით. პარლამენტის პირველი ვიცე-სპიკერი, თამარ ჩუგოშვილი და პარლამენტის იურიდიულ საკითხთა კომიტეტის თავმჯდომარე, ეკა ბესელია ჩაერთნენ დისკუსიაში და კოალიციის წარმომადგენლები მიიწვიეს სამუშაო ჯგუფში, რომელიც შეიმუშავებს კანონპროექტებს პროკურატურის ახალი დამოუკიდებელი სტატუსის უზრუნველსაყოფად.
ფორუმმა ხელისუფლების სხვადასხვა შტოს, იურიდიული პროფესიის, ექსპერტების, სამოქალაქო საზოგადოებისა და დონორი ორგანიზაციების დიდი ინტერესი გამოიწვია.
დღევანდელი შეხვედრა კოალიციის მიერ ორგანიზებული მე-16 საზოგადოებრივი ფორუმი იყო. კოალიცია აერთიანებს სამოქალაქო საზოგადოების 40 ორგანიზაციას და მიზნად ისახავს მართლმსაჯულების დამოუკიდებლობისა და გამჭვირვალობის ხელშეწყობას პრაქტიკის მონიტორინგისა და რეფორმების ადვოკატირების გზით", - ნათქვამია კოალიციის მიერ გავრცელებულ ინფორმაციაში.
