საპარლამენტო უმრავლესობის წევრი დიმიტრი ცქიტიშვილი ჯანდაცვის მინისტრს დავით სერგეენკოს კითხვით მიმართავს, რატომ არ იქმნება ქვეყანაში შრომის ინსპექცია.
„ჯანდაცვის სამინისტროსთან საუბარი არაერთხელ მქონია, რომ შრომის ინსპექცია უნდა შეიქმნას. ეს მთავარი ღერძია, რომელმაც ადგილებზე სახელმწიფო პოლიტიკა უნდა გაატაროს, რათა მონიტორინგის საშუალება გვქონდეს. სახელმწიფოს უფლება უნდა ჰქონდეს, ობიექტზე შევიდეს, დაათვალიეროს, სანქციები გასცეს და დარღვევევის შემთხვევაში, აღმოფხვრა მოითხოვოს და თუ არ აღმოიფხვრება, საწარმოს საქმიანობა შეაჩეროს. ეს კომპონენტები თუ არ იქნება, კანონის აღსრულება ძალიან ძნელია“, – განაცხადა ცქიტიშვილმა.
მისი თქმით, შახტის დახურვა შესაძლებელია მხოლოდ იმ შემთხვევაში, თუ დასაქმებულებს შენარჩუნებული ექნებათ სოციალური პირობები და გარანტირებული ხელფასები, სხვა შემთხვევაში, შახტის დახურვა არ შეიძლება, რადგან ამას სოციალური პრობლემები მოჰყვება.
მისივე თქმით, კანონები, რომელიც იქმნება, აღსრულება სჭირდება.
„ჯანდაცვის მინისტრისითვის პირადად და საჯაროდ არაერთხელ მითქვამს, შრომის ინსპექციას რატომ არ ვქმნით, წინ რა უდგას, რომ ძლიერი ინსპექცია შევქმნათ, რომელსაც ზედმხედველობის უფლებები ექნება. კანონებს, რომელსაც ვქმნით, აღსრულება სჭირდება. ამის პრობლემა გვაქვს და ჩვენი ხელისუფლების პასუხისმგებლობა ცალსახაა. თუ ზომები არ მივიღეთ, ეს არასოდეს დამთავრდება. ვიღაცისთვის თეორიული აბსტრაქტული მიდგომაა, თითქოს ბიზნესგარემოს რაღაც რეგულაციები აფუჭებს. არანაირი ბიზნესგარემო არ მიმაჩნია ჯანსაღად, თუ იქ ადამიანები იღუპებიან. თუ საჭიროა, უნდა დავაჯარიმოთ. სახელმწიფო იმისთვის არსებობს, რომ ჩვენი მოქალაქეები დავიცვათ, თუ ეს დაცული არ არის, არანაირი ბიზნესი არაფრად ღირს. ბიზნესი იმისთვის გვინდა, რომ ადამიანების კეთილდღეობა უკეთესი იყოს და არა – პირიქით“, – აღნიშნა ცქიტიშვილმა.
