საპარლამენტო უმრავლესობის ლიდერი, არჩილ თალაკვაძე, აცხადებს, რომ „ახალ რეგლამენტს შემოაქვს საქმიანი პოლიტიკა პარლამენტში და ის მეტად არის ორიენტირებული საზოგადოების ინტერესებსა და საჭიროებებზე“ და ამ პროექტთან დაკავშირებით სადაო საკითხები უმრავლესობის ფორმატში გადაწყდება.
ამის შესახებ განცხადება დღეს უმრავლესობის ლიდერმა, არჩილ თალაკვაძემ, გააკეთა. ის ადასტურებს, რომ უმრავლესობის ფორმატში გაიმართება კონსულტაციები და შეჯერდება პოზიციები იმ ორ სადავო საკითხზე, რომელიც პარლამენტის ქუთაისიდან თბილისში გადატანას და ასევე, დეპუტატების ეთიკის ნორმების დადგენას ეხება.
„ახალი რეგლამენტით პოლიტიკური პროცესი იმ სტანდარტში გადადის, რისი ტრადიციაც ევროპის პარლამენტებშია,“ - დასძენს თალაკვაძე. შეგახსენებთ, რომ პარლამენტის რეგლამენტის პროექტი ორ - ჯანდაცვის და დარგობრივი ეკონომიკის კომიტეტებში ჩავარდა.
