თეა წულუკიანის მიმართ ბევრი დასაბუთებული პრეტენზიაა და თუ მთავრობის მეთაურს არ სურს, ოპონირების რეჟიმში ესაუბროს საკუთარ ამომრჩევლებს, მაშინ საზოგადოების ეს განწყობა უნდა გაითვალისწინოს, - ამის შესახებ საქართველოს პრეზიდენტის საპარლამენტო მდივანმა ანა ნაცვლიშვილმა განაცხადა.
ნაცვლიშვილის განცხადებით, ვერც ერთი მნიშვნელოვანი რეფორმა, რომელიც მისი თაოსნობით დაიწყო იუსტიციის სამინისტრომ, წარმატებით ვერ განხორციელდა.
„თეა წულუკიანთან დაკავშირებით პრეზიდენტმა ძალიან ღიად ისაუბრა. საზოგადოების ძალიან ფართო ნაწილში არის ბევრი დასაბუთებული პრეტენზია წულუკიანის მიმართ, იმიტომ რომ ვერც ერთი მნიშვნელოვანი რეფორმა, რომელიც მისი თაოსნობით დაიწყო იუსტიციის სამინისტრომ, წარმატებით ვერ განხორციელდა. ეს ეხება სასამართლოს რეფორმას, სისხლის სამართლის მიმართულებით რეფორმებს, პროკურატურის და სხვა, პოლიტიკური მნიშვნელობის საკითხებს, თორემ, რა თქმა უნდა, აქ საუბარი არ არის მაგალითად, არასრულწლოვანთა მართლმსაჯულების კოდექსზე, რომელიც კანონმდებლობის ძალიან კარგი ნაწილია. ჩვენ ვსაუბრობთ იმ გარდამტეხ ცვლილებებზე, რომლის საჭიროება იყო ამ ქვეყანაში და თეა წულუკიანის ხელმძღვანელობით უწყებამ ვერც ერთი მათგანი წარმატებით ვერ განახორციელა. მის მიმართ ძალიან ბევრი პრეტენზიაა როგორც სამოქალაქო საზოგადოებაში, ასევე, საზოგადოების ფართო ჯგუფებში და თუ მთავრობის მეთაურს არ სურს, რომ ოპონირების რეჟიმში ესაუბროს საკუთარი ქვეყნის მოქალაქეებს და საკუთარ ამომრჩევლებს, მაშინ საზოგადოების ეს განწყობა გათვალისწინებული უნდა იყოს“, - განაცხადა ანა ნაცვლიშვილმა.
