პარლამენტის თავდაცვისა და უშიშროების კომიტეტის თავმჯდომარე, ირაკლი სესიაშვილი, არ გამორიცხავს, ტენდერებთან დაკავშირებით, გარკვეული შეზღუდვები დაწესდეს.
ამის შესახებ განცხადება მან დღეს პარლამენტში, რუსეთის სასარგებლოდ ჯაშუშობისთვის გასამართლებული პეტრე დევრიშაძის კომპანიის საკითხთან დაკავშირებით, გააკეთა.
„შესყიდვებს აქვს სამართლებრივი და მორალური მხარე. სამართლებრივად, როგორც თავდაცვის სამინისტრო, ისე შსს გამართული არის, მეტიც ამ უწყებებს შესყიდვებთან დაკავშირებით აქვთ ვალდებულება, არ ჩაერიონ შესყიდვებში და კანონის შესაბამისად დაიცვან ყველა ის წესი, რაც განსაზღვრავს და არეგულირებს შესყიდვებს, მითუმეტეს, არსებობს შესყიდვების სააგენტო, რომელიც ახორციელებს ზედამხედველობას. რაც შეეხება მორალურ მხარეს, რა თქმა უნდა, არავის გვსიამოვნებს, რომ შეიძლება არასანდო პირები აწვდიდნენ თავდაცვის და შსს–ს სამინისტროს თუნდაც არასაიდუმლო დანიშნულების მასალებს... ჩვენ ვაგრძელებთ მუშაობას, გამოვნახოთ ის ფორმა, რომელიც დაემყარება საერთაშორისო პრაქტიკას და თავიდან ავიცილოთ არასაიმედო მომწოდებლების ჩართვა ტენდერებში. ეს შეიძლება იყოს გარკვეულწილად რისკების შემცველი, მაგრამ სახელმწიფო ინტერსებიდან გამომდინარე, შეიძლება, გარკვეული შეზღუდვები დავაწესოთ და სწორი ფორმა გამოვნახოთ,“ – განაცხადა ირაკლი სესიაშვილმა.
