თბილისის საქალაქო სასამართლო არასრულწლოვანთა ტრეფიკინგის ბრალდებით თბილისში დაკავებული ცოლ-ქმრის აღკვეთის ღონისძიების შეფარდების საკითხზე მსჯელობს.
მოსამართლე არსენ კალატოზიშვილმა დააკმაყოფილა პროკურორის შუამდგომლობა და სხდომა დახურა, რადგან მასზე არასრულწლოვნებთან დაკავშირებით მსჯელობენ.
პროცესის დაწყებამდე ბავშვების დედამ განაცხადა, ბავშვებზე არ ძალადობდნენ და ნებაყოფლობით ამათხოვრებდნენ.
„ეს ბავშვები ჩემი შვილები არიან, ავად ვარ და ისინი გასაზრდელად მამიდას და ბიძას მივეცი. ქირით ვცხოვრობ, მყავს კიდევ ორი შვილი. მამიდაჩემს რომ მივეცი ბავშვები, ვუთხარი, თუ გინდა იმათხოვრეთ, ფული შეაგროვეთ-თქო. თავისთვის დადიოდნენ, ფულს შოულობდნენ, ჭამდნენ. მეც ვმათხოვრობ. არ ყოფილა ძალადობა. ვიცოდი, რომ მათხოვრობდნენ, სკოლისთვის ფულს აგროვებდნენ, ხატებს ყიდდნენ. ძალადობა არ იყო ჩემს შვილებზე. ისინი ამას საკუთარი ნებით აკეთებდნენ“, – განაცხადა მ. ლ.-მ.
ადვოკატი მაია უსტარიშვილი აცხადებს, რომ დაკავებულები კანონით მინიჭებულ დუმილის უფლებას იყენებენ. მისივე თქმით, ისინი წარდგენილ ბრალდებაში თავს დამნაშავედ არც ცნობენ. „ტრეფიკინგთან საქმე არ გვაქვს, არც ძალადობასთან“, – განაცხადა ადვოკატმა.
