პრეზიდენტისთვის მოქალაქეობის მინიჭების უფლების ჩამორთმევის საკითხს იურიდულ კომიტეტზე ხმაურის ფონზე განიხილეს. ახალი ცვლილების მიხედვით, პრეზიდენტს ეკრძალება იმ კომისიის თავმჯდომარის დანიშვნა, რომელმაც მოქალაქეობის მინიჭებასთან დაკავშირებით სწორედ პრეზიდენტს უნდა მოუმზადოს კონკრეტულ პირებთან დაკავშირებით რეკომენდაციები.
საქართველოს პრეზიდენტის საპარლამენტო მდივნის, ანა ნაცვლიშვილის თქმით, მნიშვნელოვანია, პრეზიდენტმა დანიშნოს კომისიის ხელმძღვანელი პირი და დააწესოს დღის წესრიგი, რაც კანონპროექტით ამ ეტაპზე არ არის გათვალისწინებული.
„პრეზიდენტის უფლებამოსილებები მნიშვნელოვნად მცირდება. შემოთავაზებულ ცვლილებაში ჩვენ ვხედავთ, რომ კომისია, რომელიც ინსტრუმენტია და დამხმარე ფუნქცია აქვს, მას ჰყავს თავმჯდომარე და პრეზიდენტს ერთმევა თავმჯდომარის დანიშვნის უფლება. გთხოვდით, მიმითითოთ, კონსტიტუციის კონკრეტულად რომელი ჩანაწერი ამბობს, რომ თავმჯდომარის დანიშვნის უფლება უნდა წაერთვას პრეზიდენტს. თუ აქ ცვლილებები არ განხორციელდება, გამოდის, რომ ჩვენ კონსტიტუციასთან ჰარმონიზებას კი არ ვაკეთებთ კანონმდებლობის, პირიქით, გაცილებით უფრო ვცდებით იმას, რასაც კონსტიტუცია გვეუბნება,“ - განაცხადა ნაცვლიშვილმა. მის ამ მოთხოვნას კი მმართველი გუნდის მხრიდან უკმაყოფილება მოჰყვა,კ რაც ხმამაღალ კამათში გადაიზარდა.
ფრაქცია „ქართული ოცნების“ წევრი, გედევან ფოფხაძე აცხადებს, რომ კანონპროექტში ცვლილებების შეტანით ქვეყნის პირველი პირი უფლებამოვალეობას ბოროტად ვერ გამოიყენებს. საქართველოს იუსტიციის მინისტრის პირველი მოადგილე, მიხეილ სარჯველაძე, კი აცხადებს, რომ მოქალაქეობის მინიჭებისთვის შექმნილმა კომისიამ აღმასრულებელი ხელისუფლების ამოცანები უნდა შეასრულოს.
ანა ნაცვლიშვილმა კი სარჯველაძის საპასუხოდ აღნიშნა, რომ პრეზიდენტისთვის კომისიის ხელმძღვანელის დანიშვნის უფლების ჩამორთმევა „თეა წულუკიანის შეხედულების გატარებას ემსახურება“.
