სამსახურიდან გაშვება, ცუდად გახდომა და ა.შ. ვერავის გაათავისუფლებს პასუხისმგებლობისგან, რომ მოვიდეს და ახსნა-განმარტება მოგვცეს, - ამის შესახებ ხორავას ქუჩაზე მოზარდების მკვლელობის საქმესთან დაკავშირებით შექმნილი საგამოძიებო კომისიის თავმჯდომარემ სერგი კაპანაძემ განაცხადა, რითაც გამოეხმაურა იმ ფაქტს, რომ შსს-ს დეტექტივების სამმართველოს უფროსი იოსებ სიგუა პარლამენტის საგამოძიებო კომისიის დღევანდელ სხდომას არ ესწრება.
შსს-ს განმარტებით, სიგუა სხდომას ჯანმრთელობის მდგომარეობის გამო არ ესწრება. უწყებისვე განმარტებით, საჭიროების შემთხვევაში, ჯანმრთელობის მდგომარეობის დამადასტურებელ დოკუმენტაციას წარადგენს.
როგორც კომისიის თავმჯდომარე, სერგი კაპანაძე აცხადებს, ყველაფრის მიუხედავად, სიგუას კითხვებზე პასუხის გაცემა მოუწევს.
„სამწუხაროა, რომ ბატონი სიგუა ჯერ არ მოსულა. პრესიდან გავიგეთ, რომ შეიძლება ცუდად იყოს. ამას გავარკვევთ, იმიტომ რომ ჩვენთან შეტყობინება არ მოსულა იმასთან დაკავშირებით, რომ ის ცუდად არის. თუ ეს მართლაც ასე არის, მოუწევს ამის ახსნა და დადასტურება, მაგრამ ნებისმიერ შემთხვევაში, თუ ჩვენ მის მიმართ კითხვები გვაქვს, მას მოუწევს ამ კითხვებზე პასუხის გაცემა. ეს არის გარდაუვალი. ამიტომ ყველას მინდა მოვუწოდო, რომ კარგად მოემზადონ აქ მოსასვლელად და ნუ ექნებათ იმედი, რომ ჯანმრთელობის ან სხვა რაიმე მიზეზით თავს აარიდებენ იმ კითხვებს, რომელიც გააჩნია საზოგადოებას და კომისიას.
„თუ სამსახურიდან გაუშვეს გუშინდელი სხდომის მერე, ჩვენ მოგვიწევს იმის გარკვევა, თუ რა მიზეზით გაუშვეს, რა იცის მან და რა კითხვებზე შეეცადნენ, რომ პასუხები ყოფილიყო არიდებული. ნებისმიერ შემთხვევაში, არის თუ არა თანამდებობაზე, ყველას მოუწევს კითხვებზე პასუხის გაცემა, მათ შორის შოთაძესაც“, - დასძენს კაპანაძე.
