ცნობილი ქართველი ვირტუოზი გიტარისტი თემურ ყვითელაშვილი დღეს 58 წლის გახდა. თემურ ყვითელაშვილი 1960 წლის 4 ივლისს, თბილისში დაიბადა.
1979-1987 წლებში იყო თბილისის უმაღლესი სასწავლებლების მუსიკალური ანსამბლების წევრი; 1982-1983 წლებში უკრავდა ანსამბლებში: "დიელო", 1984-1985 წლებში "ორერა", 1986-1987 წლებში "თეატრონი", 1989-1988 წლებში "ნატვრის ხე", 1988-1994 წლებში "ივერია, 1994-1998 წლებში ვ. კიკაბიძის ანსამბლში; თანამშრომლობდა ს. პავლიაშვილთან, თ. გვერდწითელთან, მ. სეფაშვილთან; ტელეკომპანია "დრონში" იყო ავტორი და წამყვანი ციკლისა "თანამედროვე მსოფლიო საგიტარო ხელოვნება". საქართველოში პირველად გამართა საგიტარო სოლო-კონცერტი ფილარმონიაში (1998); გამოცემულია მისი სოლო-ალბომები, კომპაქტური დისკები.
უცხოური პრესა ყვითელაშვილისათვის სასიამოვნო ეპითეტებს არ იშურებს და მას კლასიკური როკის ხატად წოდებულ ლეგენდარულ ჯიმი ჰენდრიქსს ადარებს. ქართველი გიტარისტის მიღწევები დაფიქსირებულია, მათ შორის, გინესის რეკორდების წიგნში: 2004 წელს მან რეკორდი დაამყარა, როდესაც 30 საათის განმავლობაში პრაქტიკულად შეუსვენებლად უკრავდა.
თემურ ყვითელაშვილი არაერთი პრესტიჟული საერთაშორისო კონკურსის ჯილდოს მფლობელია. ჰოლივუდში გამართულ გიტარისტების კონკურსზე ალან ჰოლდსვორტმა ის „წლის საუკეთესო გიტარისტად“ დაასახელა. გარდა ამისა, ყვითელაშვილი არის „ქალაქ თბილისის საპატიო მოქალაქე“, „ღირსების ორდენის კავალერი“.
არტისტი კონცერტებს მართავს საქართველოში, რუსეთში, აშშ-ში, ინგლისში, ბელგიაში, საფრანგეთში, კანადაში, ავსტრალიაში, იაპონიასა და მსოფლიოს სხვა ქვეყნებში. თემურ ყვითელაშვილის მიერ გამოცემულმა ცხრა სოლო ალბომმა პროფესიონალური საზოგადოების მაღალი შეფასება დაიმსახურა
