„ტელეფონი, რომლითაც ჩანაწერი გავაკეთე, შვილს მივეცი. დაკარგა, გაიზრდება, ვკითხავ, სად წაიღო და მოგიტანთ,“ - ასე უპასუხა ზვიად კუპრავამ დღეს საგამოძიებო კომისიის სხდომაზე მამუკა მდინარაძის შეკითხვას, რომელიც მის მიერ გაკეთებულ ჩანაწერს და ტელეფონს ეხებოდა. კომისიის წევრი, ფრაქცია "ქართული ოცნების" თავმჯდომარე, მამუკა მდინარაძე, დაინტერესდა, სად არის ტელეფონი, რომლითაც ხორავას ქუჩაზე მომხდარი ინციდენტის მონაწილე რამდენიმე არასრულწლოვანი ჩაიწერეს ფარულად ზვიად კუპრავამ და მამამ ზაზა სარალიძემ.
კუპრავამ კი მის პასუხად განაცხადა, რომ არ იცის, სად არის ტელეფონი, რადგან, მისი თქმით, ტელეფონი მცირეწლოვან შვილს მისცა და დაკარგა. „ეს ჩანაწერი გავაკეთეთ მე და ზაზამ. მე ვიცოდი, რომ ეს ბავშვები მნიშვნელოვან ინფორმაციებს მოგვაწვდიდნენ... ჩანაწერი ბატონმა ზაზამ გაკეთა, მგონი, ჩემი ტელეფონით იმიტომ, რომ ზაზას ტელეფონი ხარვეზიანი იყო... ტელეფონზე მე გამოძიებას ვუთხარი, რომ ბავშვს დავაკავე ხელში, სად წაიღო ვერ ვაგნებ, როგორც კი ვიპოვი ან ბავშვი გაიზრდება, ლაპარაკს დაიწყებს და მეტყვის, მამა, კარადის უკან არის, მოგიტანთ და ჩაგაბარებთ," - განაცხადა ზვიად კუპრავამ.
ამასთან, მისი თქმით, გამომძიებელი ცდილობდა მისგან ტელეფონის ამოღებას. „ იმის ნაცვლად, რომ ჩანაწერი ამოეღო, ტელეფონი უნდოდა. მე ვუთხარი, ჩემ ტელეფონს არ მოგცემთ, ჩანაწერი ამოიღეთ მეთქი. მე ვუთხარი, რაში გჭირდებათ ჩემი ტელეფონი, რომლის ჩანაწერი ორიგინალი "რუსთავი2"-ს და "ტვპირველს" გააჩნია და შეგიძლიათ, მარტივად ამოიღოთ ეს,“ - განაცხადა კუპრავამ.
