ხორავას ქუჩაზე მომხდარი მკვლელობის საქმეზე შექმნილი საგამოძიებო კომისიის სხდომაზე ზვიად კუპრავამ განაცხადა, რომ „მირზა სუბელიანი საკუთარი შვილის გამოკითხვის დროს გამომძიებელს თავზე ადგა, როგორც მონიტორინგის სამსახური“.
მან სხდომაზე ის გარემოებებიც გაიხსენა, რის გამოც მას და ზაზა სარალიძეს საქმის მიმდინარეობისას კითხვები ეტაპობრივად უჩნდებოდათ და გამოძიებაში ეჭვი მას შემდეგ შეიტანეს, რაც ფაქტობრივი გარემოებები ხდებოდა ცნობილი. „თუნდაც ის ფაქტი, რომ დეპუტატის შვილი მონაწილეობდა და საქმის მასალებში არ ფიგურირებდა, თუნდაც ის, რომ მირზა სუბელიანი მუშაობდა პროკურატურაში და როდესაც მისი შვილი იკითხებოდა მას ახლდა თან. მართალია ის, როგორც მშობელი ახლდა თან, თუმცა ამავდროულად თავზე ადგა გამომძიებელს, რომელიც კითხვებს უსვამდა მის შვილს. ამ დროს გამომძიებელი ვერ დასვამს კრიტიკულ კითხვებს. მირზა იყო დაინტერესებული პირი. სწორედ ჩვენი იმდროინდელი შეფასებით, მირზა იყო მონიტორინგის სამსახურის შემსრულებელი, რათა მის შვილთან კრიტიკული კითხვა არ დასმულიყო,” - განაცხადა ზვიად კუპრავამ.
